ຕາມຂ່າວສານຊິ່ນຮວາ: ຕອນຄ່ຳວັນທີ 21 ກຸມພານີ້, ໃນກອງປະຊຸມຄັ້ງທຳອິດທາງການຂອງສະພາມານດິຟປີ 2018, ທ່ານ ອັບດູນລາ ຢາມິນ ປະທານາທິບໍດີມານດິຟກ່າວວ່າ, ຂະແໜງການຕ່າງໆ ເຊິ່ງລວມທາງຂະແໜງການທ່ອງທ່ຽວ ຂອງມານດິຟ ຈະດຶງດູດທຶນຕ່າງປະເທດ 3 ຕື້ 400 ລ້ານໂດລາພາຍໃນ 5 ປີ.
ທ່ານຢາມິນກ່າວວ່າ, ປີກາຍນີ້, ລັດຖະບານມານດິຟໄດ້ຮັບໃບສະເໜີຂໍອະນຸຍາດລົງທຶນໃນຂະແໜງການທ່ອງທ່ຽວຢູ່ມານດິຟ 40 ສະບັບຈາກຫຼາຍປະເທດ, ແລະມີມູນຄ່າປະມານ 1 ຕື້ 600 ລ້ານໂດລາ, ຂະແໜງການອື່ນໆກໍ່ໄດ້ຮັບໃບສະເໜີຂໍອະນຸຍາດລົງທຶນ 50 ສະບັບທີ່ມີມູນຄ່າປະມານ 1 ຕື້ 800 ລ້ານໂດລາ.
ທ່ານຢາມິນກ່າວວ່າ, ໃນຫຼາຍປີຜ່ານມານີ້, ລັດຖະບານແລະປະຊາຊົນມານດິຟໄດ້ຮ່ວມກັນອອກແຮງເພື່ອພັດທະນາເສດຖະກິດ, ປັດຈຸບັນໄດ້ຮັບການຕອບຮັບຢ່າງເດັ່ນຊັດ ເຊັ່ນວ່າ: ປີກາຍນີ້ ກໍ່ໄດ້ເຊັນສັນຍາການຄ້າເສລີກັບຈີນແລ້ວ, ແລະສິນຄ້າຈຳນວນຫຼວງຫຼາຍທີ່ຄ້າຂາຍລະຫວ່າງມານດິຟກັບຈີນກໍ່ຈະມີການຍົກເວັ້ນພາສີ.