ວັນທີ 23 ກຸມພານີ້, ຄະນະກຳມະການຄັງສຳຮອງສະຫະລັດອາເມລິກາຫຼື FRB ໄດ້ຍື່ນບົດລາຍງານນະໂຍບາຍເງິນຕາໄລຍະເຄິ່ງປີໃຫ້ລັດຖະສະພາໂດຍລະບຸວ່າ: ເສດຖະກິດອາເມລິກາໄດ້ມີການເຕີບໂຕຢ່າງໜັກແໜ້ນ ເຊິ່ງຈະສະໜັບສະໜູນໃຫ້ອົງການຕົນສືບຕໍ່ບີບນະໂຍບາຍເງິນຕາແບບຄ່ອຍເປັນຄ່ອຍໄປ.
ບົດລາຍງານລະບຸວ່າ: ປະລິມານການປະກອບອາຊີບເພີ່ມຂຶ້ນຢ່າງໜັກແໜ້ນ, ແຕ່ລະຄອບຄົວມີຊັບສິນເພີ່ມຂຶ້ນ, ຄວາມໝັ້ນໃຈຂອງຜູ້ບໍລິໂພກເພີ່ມຂຶ້ນ, ເສດຖະກິດໂລກເຕີບໂຕຢ່າງແຂງແຮງ ແລະສະພາບແວດລ້ອມການທະນາຄານທີ່ຜ່ອນຄາຍຈະສືບຕໍ່ສະໜັບສະໜູນໃຫ້ເສດຖະກິດມີການພັດທະນາ.
ບົດລາຍງານຍັງຊີ້ໃຫ້ເຫັນຕື່ມວ່າ: ປະຈຸບັນ, ຕະຫຼາດແຮງງານຂອງອາເມລິກາມີທ່າອ່ຽງພັດທະນາຢ່າງຕໍ່ເນື່ອງ, ແຕ່ອັດຕາເງິນເຟີ້ຍັງຕ່ຳກວ່າຄາດໝາຍຄື 2%. ແລະຄາດຄະເນວ່າ: ປີນີ້, ອົງການຕົນຈະເພີ່ມດອກເບັ້ຍ 3 ເທື່ອ. ໃນກອງປະຊຸມນະໂຍບາຍເງິນຕາທີ່ຈັດຂຶ້ນໃນທ້າຍເດືອນມັງກອນແລ້ວນີ້, ອົງການດັ່ງກ່າວເຜີຍໃຫ້ຮູ້ວ່າຈະຮັກສາອັດຕາດອກເບັ້ຍເງິນຕາຂອງສະຫະລັດໃຫ້ຄືເກົ່າ.
ເຖິງວ່າຕະຫຼາດການທະນາຄານຂອງອາເມລິກາໄດ້ເກີດມີສະພາບປັ່ນປ່ວນໃນໄລຍະນີ້ກໍ່ຕາມ, ແຕ່ບົດລາຍງານຂອງ FRB ເຫັນວ່າ, ລະດັບຄວາມສ່ຽງຂອງລະບົບການທະນາຄານອາເມລິກາເວົ້າລວມແລ້ວບໍ່ສູງປານໃດ.
 |
