ກອງປະຊຸມບໍ່ເປັນທາງການຂອງຜູ້ນຳສະຫະພາບເອີຣົບຫຼືອີຢູໄດ້ຈັດຂຶ້ນຢູ່ສຳນັກງານໃຫຍ່ສະຫະພາບເອີຮົບທີ່ນະຄອນຫຼວງບຣຸກແຊນປະເທດແບນຊິກໃນວັນທີ 23 ກຸມພານີ້ໂດຍຜູ້ນຳ 27 ປະເທດສະມາຊິກສະຫະພາບເອີຣົບທີ່ບໍ່ລວມທັງອັງກິດໄດ້ຫາລືບັນຫາຕ່າງໆເປັນຕົ້ນງົບປະມານການເງິນຫຼາຍປີຫຼັງອັງກິດຖອນອອກຈາກສະຫະພາບເອີຣົບ, ການເລືອກຕັ້ງສະພາເອີຣົບກໍຄືການທີ່ຈະເລືອກຕັ້ງປະທານຄະນະກຳມາທິການສະຫະພາບເອີຮົບຊຸດໃໝ່ແນວໃດແລະອື່ນໆ. ທ່ານໂດນັນ ຕູສກ໌ ປະທານຄະນະກຳມະການເອີຣົບຢືນຢັນວ່າຫວັງຈະໄດ້ຮັບຮູ້ແຜນການກ່ຽວກັບອັງກິດຖອນອອກຈາກເອີຣົບໃຫ້ລະອຽດຕື່ມໃນໂອກາດພົບປະກັບນາຍົກລັດຖະມົນຕີອັງກິດເມື່ອອາທິດໜ້າ.
ຕາມແຜນການແລ້ວ, ອັງກິດຈະຖອນອອກຈາກສະຫະພາບເອີຣົບຢ່າງເປັນທາງການໃນວັນທີ 29 ມີນາ 2019, ແຕ່ສື່ມວນຊົນອັງກິດເປີດເຜີຍວ່າ: ຕາມເອກະສານກ່ຽວກັບການເຈລະຈາຖອນອອກຈາກສະຫະພາບເອີຣົບສະບັບໜຶ່ງ, ລັດຖະບານອັງກິດຫວັງຢາກແກ່ຍາວໄລຍະຂ້າມຜ່ານໃນການຖອນອອກຈາກສະຫະພາບເອີຣົບ, ຫາກບໍ່ແມ່ນເວລາ 21 ເດືອນຕາມທີ່ ສະຫະພາບເອີຣົບໄດ້ສະເໜີ. ນອກນີ້, ລັດຖະບານອັງກິດຫວັງວ່າໃນໄລຍະຂ້າມຜ່ານ ຈະບໍ່ປະຕິບັດຕາມກົດລະບຽບໃໝ່ທີ່ສະຫະພາບເອີຮົບປະກາດໃຊ້, ແຕ່ສະຫະພາບເອີຣົບໄດ້ຮຽກຮ້ອງໃຫ້ອັງກິດຕ້ອງປະຕິບັດກົດລະບຽບໃໝ່.
 |
