ຕອນຄ່ຳວັນທີ 23 ກຸມພານີ້ ຢູ່ທຳນຽບປະທານາທິບໍດີຊົງວາເດ ທ່ານມູນແຈອິນ ປະທານາທິບໍດີສ.ເກົາຫຼີໄດ້ພົບປະກັບທ່ານນາງອີວັນກາ ທຣຳ ລູກສາວທ່ານໂດນັນ ທຣຳ ປະທານາທິບໍດີອາເມລິກາ, ທັງເປັນຜູ້ຊ່ວຍແລະທີ່ປຶກສາຂອງປະທານາທິບໍດີ, ໂດຍກ່າວເນັ້ນວ່າການສົນທະນາກ່ຽວກັບບັນຫາແຫຼມເກົາຫຼີປອດ ອາວຸດນິວເຄຼຍນັ້ນຄວນຊຸກຍູ້ໄປພ້ອມກັບການສົນທະນາເໜືອໃຕ້.
ໃນການພົບປະຄັ້ງນີ້ ທ່ານມູນແຈອິນກ່າວວ່າ, ການສົນທະນາກ່ຽວກັບບັນຫາແຫຼມເກົາຫຼີປອດອາວຸດນິວເຄຼຍກັບການສົນທະນາເໜືອໃຕ້ແມ່ນບໍ່ສາມາດຕັດແຍກອອກຈາກກັນໄດ້, ສ.ເກົາຫຼີແລະອາເມລິກາຄວນເພີ່ມທະວີການຮ່ວມມືກັນໃຫ້ແໜ້ນແຟ້ນກວ່າເກົ່າ. ທ່ານມູນແຈອິນກ່າວຕື່ມວ່າ, ສ.ເກົາຫຼີບໍ່ຍອມຮັບວ່າສປປເກົາຫຼີມີອາວຸດນິວເຄຼຍຢ່າງເດັດຂາດ, ແຕ່ໃນ 25 ປີຜ່ານມາ ເຖິງວ່າລັດຖະບານສ.ເກົາຫຼີແລະອາເມລິກາໄດ້ຮ່ວມກັນທຳຄວາມພະຍາຍາມເພື່ອແກ້ໄຂໃຫ້ແຫຼມເກົາຫຼີປອດອາວຸດນິວເຄຼຍນັ້ນ ພັດບໍ່ໄດ້ຮັບຜົນຫຍັງເລີຍ, ຫວັງວ່າສ.ເກົາຫຼີແລະອາເມລິກາຈະກຳໂອກາດໃນປັດຈຸບັນນີ້, ເພື່ອບັນລຸເປົ້າໝາຍໃຫ້ແຫຼມເກົາຫຼີປອດ ອາວຸດນິວເຄຼຍ.
ທ່ານນາງອີວັນກາພາຄະນະຜູ້ແທນອາເມລິກາເດີນທາງໄປຮອດສ.ເກົາຫຼີໃນມື້ດຽວກັນ ເຊິ່ງຈະໄປຊົມການແຂ່ງຂັນງານກິລາໂອລິມປິກລະດູໜາວໃນລາຍການແຂ່ງຂັນຈຳນວນໜຶ່ງໃນວັນທີ 24-25 ກຸມພານີ້, ແລະຈະເຂົ້າຮ່ວມພິທີປິດງານໂອລິມປີກລະດູໜາວພຽງຊາງໃນວັນທີ 25 ກຸມພານີ້.
ໃນຂະນະດຽວກັນ, ສປປເກົາຫຼີກໍ່ຈະສົ່ງຄະນະຜູ້ແທນລະດັບສູງທີ່ນຳໂດຍທ່ານກິມຢົງໂຈ ຮອງປະທານຄະນະກຳມະການສູນກາງພັກແຮງງານ, ເພື່ອເຂົ້າຮ່ວມພິທີປິດງານໂອລິມປີກລະດູໜາວພຽງຊາງເຊັ່ນດຽວກັນ.
 |
