ຂ່າວສານອັນຕາລາອິນໂດເນເຊຍລາຍງານໃນວັນທີ 25 ກຸມພານີ້ວ່າ: ປີ 2017 ຜ່ານມາ, ຂະແໜງການປະຕິບັດກົດໝາຍຂອງປະເທດຕົນສາມາດມ້າງຄະດີຄ້າຂາຍຢາເສບຕິດ ໄດ້ 342 ລາຍແລະຢຶດຢາເສບຕິດໄດ້ 2132 ໂຕນ. ສະເພາະແຕ່ເວລາບໍ່ຮອດ 2 ເດືອນຜ່ານມາ, ກໍສາມາດມ້າງຄະດີຂ້າຂາຍຢາເສບຕິດໄດ້ເກືອບ 60 ລາຍ, ຢຶດຢາໄອສໄດ້ເຖິງ 5,9 ໂຕນ.
ຄະນະກຳມະການປາບປາມຢາເສບຕິດແຫ່ງຊາດອິນໂດເນເຊຍເປີດເຜີຍວ່າ: ໃນຊຸມປີຜ່ານມາ,ຈຳນວນຜູ້ເສບຢາເສບຕິດປະເທດຕົນໄດ້ເພີ່ມຂຶ້ນຢ່າງຕໍ່ເນື່ອງ. ປີ 2008 ມີ 3 ລ້ານ 3 ແສນຄົນ; ປີ 2011 ເພີ່ມຂຶ້ນເຖິງ 4 ລ້ານຄົນ ແລະປີ 2015 ກໍເພີ່ມຂຶ້ນເປັນ 5 ລ້ານ 1 ແສນຄົນ. ຕາມການສຳຫຼວດຮ່ວມຂອງຄະນະກຳມະການປາບປາມຢາເສບຕິດແຫ່ງຊາດອິນໂດເນເຊຍກັບມະຫາວິທະຍາໄລອິນໂດເນເຊຍສະແດງໃຫ້ເຫັນວ່າ, ຜູ້ເສບຢາເສບຕິດປະມານ 70% ເປັນຄົນໄວໜຸ່ມ.