ວັນທີ 25 ກຸມພານີ້, ທຳນຽບປະທານາທິບໍດີຝຣັ່ງອອກຖະແຫຼງການວ່າ: ໃນວັນດັ່ງກ່າວ, ທ່ານແອມມານູເອວ ມາກຄຼົງ ປະທານາທິບໍດີຝຣັ່ງ ແລະທ່ານນາງ ແອງເຈີລາ ເມີເຄວ ນາຍົກລັດຖະມົນຕີເຢຍລະມັນໄດ້ສົນທະນາຜ່ານທາງໂທລະສັບກັບທ່ານ ວາຣະດີເມຍ ປູຕິນ ປະທານາທິບໍດີຣັດເຊຍໂດຍຝຣັ່ງ ແລະເຢຍລະມັນຢືນຢັນຍິນດີຊຸກຍູ້ຂະບວນການສັນຕິພາບຊີຣີຮ່ວມກັບຣັດເຊຍ.
ຖະແຫຼງການດັ່ງກ່າວລະບຸວ່າ: ຜູ້ນຳຝຣັ່ງ, ເຢຍລະມັນ ແລະຣັດເຊຍໄດ້ຊົມເຊີຍຕໍ່ມະຕິທີ່ອົງການສະຫະປະຊາຊາດຮຽກຮ້ອງໃຫ້ທົ່ວປະເທດຊີຣີຢຸດຍິງຢ່າງໜ້ອຍ 30 ມື້ ເຊິ່ງໄດ້ຮັບຮອງຢ່າງເປັນເອກະພາບກັນຈາດສະພາຄວາມໝັ້ນຄົງອົງການສະຫະປະຊາຊາດໃນວັນທີ 24 ກຸມພານີ້. ຜູ້ນຳຝຣັ່ງ ແລະເຢຍລະມັນຮຽກຮອງໃຫ້ບັນດາຝ່າຍທີ່ມີບົດບາດຕໍ່ສະພາບການຊີຣີຊຸກຍູ້ການຈັດຕັ້ງປະຕິບັດມະຕິດັ່ງກ່າວຢ່າງເຂັ້ມງວດ.
ຖະແຫຼງການລະບຸຕື່ມວ່າ: ເພື່ອຮ່ວມກັນຊຸກຍູ້ຂະບວນການສັນຕິພາບຊີຣີ, ທ່ານຊອງອິຟ ເລີ ເດຼນ ລັດຖະມົນຕີກະຊວງການຕ່າງປະເທດຝຣັ່ງຈະເດີນທາງໄປນະຄອນຫຼວງມົດສະກູປະເທດຣັດເຊຍໃນວັນທີ 27 ກຸມພານີ້ ເພື່ອເຈລະຈາກັບຝ່າຍຣັດເຊຍ.
 |
