ທຳນຽບປະທານາທບໍດີຊົງວາເດ ສ. ເກົາຫຼີ ລາຍງານໃນວັນທີ 25 ກຸມພານີ້ວ່າ, ມື້ດຽວກັນ, ທ່ານ ມຸນແຈອິນ ປະທານາທິບໍດີ ໄດ້ຕ້ອນຮັບການເຂົ້າຢ້ຽມຄຳນັບຂອງຄະນະຜູ້ແທນລະດັບສູງຂອງ ສປປ ເກົາຫຼີ ແລະໃນໂອກາດດັ່ງກ່າວ, ຄະນະຜູ້ແທນ ສປປ ເກົາຫຼີ ກ່າວວ່າ ປະເທດຕົນ "ມີເຈຕະນາເຕັມປ່ຽມ" ໃນການເຈລະຈາກັບອາເມລິກາ.
ທ່ານ ກິມອຸຍກຽມ ໂຄສົກທຳນຽບປະທານາທິບໍດີ ສ. ເກົາຫຼີ ໃຫ້ຮູ້ວ່າ, ມື້ດຽວກັນ, ທ່ານ ມຸນແຈອິນ ໄດ້ຕ້ອນຮັບການເຂົ້າພົບຂອງຄະນະຜູ້ແທນລະດັບສູງຂອງ ສປປ ເກົາຫຼີ ທີ່ມາເຂົ້າຮ່ວມພິທີປິດງານກິລາໂອແລັມປິກລະດູໜາວ ແລະ ສອງຝ່າຍໄດ້ເຈລະຈາກັນເປັນເວລາໜຶ່ງຊົ່ວໂມງ. ໂອກາດດັ່ງກ່າວ, ທ່ານ ມຸນແຈອິນ ກ່າວວ່າ, ໃນໄລຍະງານກິລາໂອແລັມປິກລະດູໜາວ, ສ. ເກົາຫຼີ ແລະ ສປປ ເກົາຫຼີ ໄດ້ປະກອບເປັນທີມປະສົມເພື່ອເຂົ້າຮ່ວມການແຂ່ງຂັນ, ໄດ້ຮ່ວມກັນເຂົ້າສະໜາມໃນພິທີເປີດງານ ໂດຍໄດ້ເຮັດໃຫ້ທົ່ວໂລກຕື້ນຕັນໃຈ. ພາຍໃຕ້ຄວາມພະຍາຍາມຮ່ວມຂອງສອງຝ່າຍ, ງານກິລາໂອແລັມປິກລະດູໜາວພຽງຊາງ ໄດ້ກາຍເປັນງານກິລາໂອແລັມປິກທີ່ມີສັນຕິພາບຄັ້ງໜຶ່ງ.
ທ່ານ ກິມອຸຍກຽມ ໃຫ້ຮູ້ຕື່ມວ່າ, ໃນການເຈລະຈາ, ທ່ານ ມຸນແຈອິນສະແດງຄວາມຫວັງວ່າ, ສາຍພົວພັນເໜືອໃຕ້ຈະໄດ້ຮັບຄວາມຄືບໜ້າໃຫຍ່ກວ່າເກົ່າແລະໃນຂອບເຂດກວ້າງກວ່າເກົ່າ, ສປປ ເກົາຫຼີ ກໍຕອບວ່າ, ທ່ານ ກິມເຈິງອຸນ ປະທານຄະນະກຳມະການລັດຖະກິດປະເທດຕົນ ກໍມີຄວາມເຫັນເຊັ່ນດຽວກັນ. ທ່ານ ມຸນແຈອິນ ກ່າວຕື່ມວ່າ, ເພື່ອປັບປຸງສາຍພົວພັນເໜືອໃຕ້ ແລະແກ້ໄຂບັນຫາແຫຼມເກົາຫຼີຢ່າງເຖິງຖອງ, ຄວນເປີດການເລຈະລະຫວ່າງ ສປປ ເກົາຫຼີ ກັບອາເມລິກາໂດຍໄວ. ສປປ ເກົາຫຼີ ກໍສະແດງຄວາມເຫັນດີຕໍ່ເລື່ອງນີ້ ແລະກ່າວວ່າ, ສາຍພົວພັນສປປເກົາຫຼີ-ສ.ເກົາຫຼີຄວນຂະຫຍາຍໄປພ້ອມກັບສາຍພົວພັນສປປເກົາຫຼີ-ອາເມລິກາ.