ວັນທີ 26 ກຸມພານີ້, ທ່ານອັນໂຕນີໂອ ກູເຕີເຣັສ ເລຂາທິການໃຫຍ່ອົງການສະຫະປະຊາຊາດຢືນຢັນວ່າ ການປ້ອງກັນການປະທະກັນເປັນໜ້າວຽກບຸລິມະສິດຂອງອົງການສະຫະປະຊາຊາດ, ສ່ວນ ການເຄົາລົບນັບຖືສິດທິມະນຸດເປັນວິທີທີ່ດີທີ່ສຸດໃນການປ້ອງກັນການປະທະກັນດ້ວຍຄວາມຮຸນແຮງ.
ທ່ານກູເຕີເຣັສໄດ້ປະກອບຄຳເຫັນໃນພິທີເປີດກອງປະຊຸມເທື່ອທີ 37 ຂອງສະພາສິດທິມະນຸດອົງການສະຫະປະຊາຊາດໃນວັນທີ 26 ກຸມພານີ້ວ່າ: ຖ້າວ່າສິດທິມະນຸດໃນທົ່ວໂລກໃນໄລຍະ 20 ປີຜ່ານມາໄດ້ຮັບການປົກປ້ອງໃຫ້ດີກວ່າເກົ່າແລ້ວ, ການປະທະກັນດ້ວຍຄວາມຮຸນແຮງຢ່າງຫຼວງຫຼາຍໃນປັດຈຸບັນກໍຈະສາມາດຫຼີກລ້ຽງໄດ້ ແລະປະຊາຊົນນັບເປັນລ້ານຊີວິດກໍຈະໄດ້ຮັບການຊ່ວຍເຫຼືອເຊັ່ນກັນ.
ທ່ານກູເຕີເຣັສຢືນຢັນວ່າ: ການປະທະກັນດ້ວຍຄວາມຮຸນແຮງທັງໝົດທີ່ເກີດຂຶ້ນໃນໂລກປັດຈຸບັນລ້ວນແຕ່ມີການພົວພັນຢ່າງແໜ້ນແຟ້ນກັບສິດທິມະນຸດທີ່ຖືກລະເມີດ. ມີພຽງແຕ່ເຄົາລົບນັບຖືແລະສົ່ງເສີມການປົກປ້ອງສິດທິມະນຸດຕື່ມອີກເທົ່ານັ້ນ,ຈິ່ງຈະສາມາດບັນລຸເປົ້າໝາຍການພັດທະນາແບບຍືນຍົງຮອດປີ 2030 ຂອງອົງການສະຫະປະຊາຊາດໄດ້ຢ່າງແທ້ຈິງ ແລະເຮັດໃຫ້ໂລກພວກເຮົາກາຍເປັນບ້ານເມືອງຂອງມວນມະນຸດທີ່ມີຄວາມຫຼາກຫຼາຍ,ກວມລວມ,ຍືນຍົງ,ສັນຕິພາບແລະປອດໃສ.