ວັນທີ 26 ກຸມພານີ້, ສຳນັກງານການຄ້າກັບຕ່າງປະເທດແລະການລົງທຶນສະຫະພັນເຢຍລະມັນ ແລະ ສະພາອຸດສາຫະກຳການຄ້າທີ່ເປັນຕົວແທນໃຫ້ແກ່ວົງການວິສາຫະກິດເຢຍລະມັນ ໄດ້ຮ່ວມກັນເປີດເຜີຍບົດລາຍງານຄົ້ນຄວ້າເລື່ອງ "ເສັ້ນທາງສາຍໄໝໃໝ່: ໂຄງການລົງທຶນຂະໜາດໃຫຍ່ຂອງຈີນ", ໂດຍເຫັນວ່າ, ຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ທີ່ສະເໜີໂດຍຈີນ ໄດ້ສ້າງໂອກາດໃຫຍ່ຫຼວງໃຫ້ແກ່ວິສາຫະກິດເຢຍລະມັນ.
ທ່ານ ໂວເຄີ ແທຣວ ຮອງຜູ້ອຳນວຍການໃຫຍ່ສະພາອຸດສາຫະກຳການຄ້າເຢຍລະມັນ ກ່າວໃນກອງປະຊຸມຖະແຫຼງຂ່າວທີ່ຈັດຂຶ້ນໃນມື້ດຽວກັນວ່າ, ພາຍໃຕ້ຂອບຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ", ຈີນແລະເອີຣົບໄດ້ເປີດເສັ້ນທາງຂົນສົ່ງໃໝ່ແລະສະດວກກວ່າເກົ່າຕາມລຳດັບ, ພື້ນຖານໂຄງລ່າງຂອງປະເທດລຽບຕາມເສັ້ນທາງ ໄດ້ຮັບການປັບປຸງໃຫ້ດີຂຶ້ນຢ່າງບໍ່ຢຸດຢັ້ງ, ທັງນີ້ ບໍ່ພຽງແຕ່ສ້າງຄວາມສະດວກໃຫ້ແກ່ການຄ້າເຢຍລະມັນ-ຈີນເທົ່ານັ້ນ, ຍັງໄດ້ສ້າງໂອກາດການຮ່ວມມືລະຫວ່າງຕະຫຼາດຈຳໜ່າຍອັນໃຫຍ່ຫຼວງແລະຕະຫຼາດທີສາມຢ່າງຫຼວງຫຼາຍໃຫ້ແກ້ວິສາຫະກິດເຢຍລະມັນ.
ບົດລາຍງານຊີ້ໃຫ້ເຫັນວ່າ, ຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ແມ່ນກຳລັງຊຸກຍູ້ທີ່ສຳຄັນໃນໂລກາພິວັດໃນອະນາຄົດ, ວິສາຫະກິດເຢຍລະມັນຄວນຕັ້ງໜ້າເຂົ້າຮ່ວມໂຄງການແລະການລົງທຶນທີ່ກ່ຽວຂ້ອງ ແລະສ້າງການພົວພັນຮ່ວມມືທີ່ຕ່າງຝ່າຍຕ່າງໄດ້ຮັບຜົນປະໂຫຍດກັບວິສາຫະກິດຈີນເປັນເວລາຍາວນານ.
 |
