ໃນກອງປະຊຸມປະຈຳປີຂອງກະຊວງທ່ອງທ່ຽວກຳປູເຈຍທີ່ຈັດຂຶ້ນໃນວັນທີ 27 ກຸມພານີ້, ທ່ານທອງຄົນ ລັດຖະມົນຕີກະຊວງທ່ອງທ່ຽວກຳປູເຈຍກ່າວວ່າ, ຄາດວ່າກຳປູເຈຍຈະຕ້ອນຮັບນັກທ່ອງທ່ຽວຈີນ 1 ລ້ານ 7 ແສນເທື່ອຄົນໃນປີ 2018, ທຽບໃສ່ໄລຍະດຽວກັນຂອງປີ 2017 ເພີ່ມຂຶ້ນ 40%.
ທ່ານທອງຄົນ ກ່າວວ່າ, ສາຍພົວພັນມິດຕະພາບລະຫວ່າງກຳປູເຈຍແລະຈີນ, ສະຖານທີ່ທ່ອງທ່ຽວທີ່ສວຍງາມຂອງປະເທດຕົນແລະຖ້ຽວບິນໄປມາໂດຍກົງລະຫວ່າງສອງປະເທດທີ່ເພີ່ມຂຶ້ນຢ່າງຕໍ່ເນື່ອງແມ່ນສາເຫດຕົ້ນຕໍທີ່ນັກທ່ອງທ່ຽວຈີນໄປທ່ຽວກຳປູເຈຍເພີ່ມຂຶ້ນຢ່າງຈະແຈ້ງ. ຕາມສະຖິຕິຂອງກະຊວງທ່ອງທ່ຽວກຳປູເຈຍສະແດງໃຫ້ເຫັນວ່າ, ປີ 2017, ກຳປູເຈຍ ໄດ້ຕ້ອນຮັບນັກທ່ອງທ່ຽວຈີນ 1 ລ້ານ 2 ແສນ 1 ໝື່ນເທື່ອຄົນ. ທ່ານທອງຄົນ ກ່າວຕື່ມວ່າ, ຄຽງຄູ່ກັບກຸ່ມຄົນທີ່ມີລາຍຮັບລະດັບກາງຂອງຈີນເພີ່ມຂຶ້ນ, ຄົນຈີນທີ່ໄປທ່ຽວຕ່າງປະເທດຈະນັບມື້ນັບຫຼາຍຂຶ້ນ.
ຂະແໜງການທ່ອງທ່ຽວແມ່ນໜຶ່ງໃນຂະແໜງການເສົາຄ້ຳຂອງກຳປູເຈຍ. ຕົວເລກສະແດງໃຫ້ເຫັນວ່າ, ກຳປູເຈຍໄດ້ຕ້ອນຮັບນັກທ່ອງທ່ຽວຕ່າງປະເທດ 5 ລ້ານ 6 ແສນເທື່ອຄົນໃນປີຜ່ານມາ. ແລະຄາດວ່າ, ປີນີ້ຕົວເລກດັ່ງກ່າວຈະເພີ່ມຂຶ້ນເປັນ 6 ລ້ານ 1 ແສນເທື່ອຄົນ.