ຄະ​ນະ​ທູດ​ຈີນ​ປະ​ຈຳ​ອາ​ຊຽນ​ຈັດ​ງານ​ລ້ຽງສະ​ຫຼອງ​ບຸນ​ຂະ​ໜົມບົວ​ລອຍ​ແລະ​ວັນ​ແມ່​ຍິງ​ສາ​ກົນ
2018-03-03 15:24:13  cri 

ວັນ​ທີ 2 ມີ​ນາ​ນີ້ເປັນ​ວັນ​ບຸນ​ຂະ​ໜົມບົວ​ລອຍ​ ​ບຸນ​ປະ​ເພ​ນີ​ຂອງ​ຈີນ, ຄະ​ນະ​ທູດ​ຈີນ​ປະ​ຈຳ​ອາ​ຊຽນ​​ໄດ້ຈັດ​ງານ​ລ້ຽງ​ສະ​ຫຼອງວັນ​ບຸນ​ດັ່ງ​ກ່າວແລະ​ວັນ​ແມ່​ຍິງ​ສາ​ກົນຢູ່​ນະ​ຄອນ​ຫຼວງ​ຈາ​ກາ​ຕາ ​ປະ​ເທດອິນ​ໂດ​ເນ​ເຊຍ. ​ໂດຍທ່ານ​​ອັກ​ໂມ​ສ​ຕັນ ​ຮອງເລ​ຂາ​ທິ​ການ​ໃຫຍ່ອາ​ຊຽນ ພ້ອມ​ພັນ​ລະ​ຍາ, ທ່ານນາງ​ຊາ​ຣີ ເບີ​ຄາ​ຢາ ປະ​ທານ​ສະ​​ຫະ​ພັນແມ່​ຍິງ​ອາ​ຊຽນ, ​ແລະເອ​ກ​ອັກ​ຄະ​ລັດ​ຖະ​ທູດບັນ​ດາ​ປະ​ເທດ​ປະ​ຈຳ​ອິນ​ໂດ​ເນ​ເຊຍ​ພ້ອມ​​ພັນ​ລະ​ຍາ​ເຂົ້າ​ຮ່ວມ, ເພື່ອ​ສະ​ຫຼອງ​ບຸນ​ຂະ​ໜົມ​ບົວ​ລອຍ​ຮ່ວມ​ກັນ, ແລະ​​ ​ສະ​ຫຼອງວັນ​ແມ່​ຍິງ​ສາ​ກົນ ທີ່​ໃກ້​ຈະ​ວຽນ​ມາ​ເຖິງ​.



ທ່ານ​ຮວງ​ຊີ​ລຽນ ເອກ​ອັກ​ຄະ​ລັດ​ຖະ​ທູດ​ຈີນ​ປະ​ຈຳ​ອາ​ຊຽນ​ກ່າວ​ປາ​ໄສວ່າ, ການ​ແລກ​ປ່ຽນ​ແລະຮ່ວມ​ມືລະ​ຫວ່າງ​ແມ່​ຍິງ​ແມ່ນ​ເນື້ອ​ໃນ​ສຳ​ຄັນ​ໃນ​ການ​ຮ່ວມ​ມື​ຮອບ​ດ້ານ​ລະ​ຫວ່າງ​ຈີນ​ກັບ​ອາ​ຊຽນ, ສອງ​ຝ່າຍ​ໄດ້​ຮ່ວມ​ກັນ​ສ້າງ​ເວ​ທີ​ຮ່ວມ​ມື​ຕ່າງໆ ເຊັ່ນ​ ເວ​ທີ​ປຶກ​ສາ​ຫາ​ລື​ນັກ​ທຸ​ລະ​ກິດ​ຍິງຈີນ-ອາ​ຊຽນ​. ​ຂະ​ນະ​ທີ່ສູນ​ອົບ​ຮົມ​ແມ່​ຍິງ​ຈີນ-ອາ​ຊຽນ ທີ່ຈີນ​ສ້າງ​ຂຶ້ນ​ນັ້ນ ໄດ້​​ຍົກ​ລະ​ດັບ​ໃຫ້ເຈົ້າ​ໜ້າ​ທີ່​ຜູ້​ຍິງ​​ຂອງປະ​ເທດ​ອາ​ຊຽນມາ​ຫຼາຍ​ຊຸດ​ແລ້ວ. ນອກ​ນີ້, ​ຈີນ​ຍັງ​ໄດ້​ດຳ​ເນີນ​ໂຄງ​ການ​ຮ່ວມ​ມື​ພັດ​ທະ​ນາ​ຢູ່​ຫຼາຍ​ປະ​ເທດ​ອາ​ຊຽນ, ເພື່ອ​ຊ່ວຍ​ເຫຼືອ​ແມ່​ຍິງ​ໃນ​ບັນ​ດາປະ​ເທດ​​ເຫຼົ່າ​ນີ້ ມີ​ວຽກ​ເຮັດ​ງານ​ທຳ, ສ້າງ​ຄວາມ​ສາ​ມາດ​ໃຫ້​ເຂົາ​ເຈົ້າ, ແລະ​ປະ​ກອບ​ອາ​ຊີບ​ຢ່າ​ງ​ສະ​ເໝີ​ພາບ.


ທ່ານ​ນາງ​ຊາ​ຣີ ​ເປີ​ຄາ​ຢາ ປະ​ທານ​ສະ​​ຫະ​ພັນແມ່​ຍິງ​ອາ​ຊຽນ​ກ່າວ​ວ່າ, ຂອບ​ໃຈ​ນຳ​ຄະ​ນະ​ທູດ​ຈີນ​ປະ​ຈຳ​ອາ​ຊຽນ​​ທີ່ຕັ້ງ​ໜ້າ​ເຂົ້າ​ຮ່ວມ​ແລະ​ສະ​ໜັ​ບ​ສະ​ໜູນ​ວຽກ​ງານ​ຂອງ​ສະ​​ຫະ​ພັນ​ແມ່​ຍິງ​ອາ​ຊຽນ, ຕໍ່​ໄປ, ສະ​​ຫະ​ພັນ​ຈະ​ຈັດ​ກິດ​ຈະ​ກຳ​​ທີ່​ມີ​ຫຼາກ​ຫຼາຍ​ສີ​ສັນ​ໃຫ້​ເຈົ້າ​ໜ້າ​ທີ່​ການ​ທູດ​ຜູ້​ຍິງ​ແລະ​ພັນ​ລະ​ຍາ​ຂອງ​ເຈົ້າ​ໜ້າ​ທີ່​ການ​ທູດ​ຜູ້​ຊາຍ​ໃຫ້​ຫຼາຍກວ່າ​ເກົ່າ.

ຂ່າວ-ບົດທີ່ກ່ຽວຂ້ອງ
ຜູ້ດຳເນີນລາຍການ