ເວັບໄຊກະຊວງການຕ່າງປະເທດຣັດເຊຍລາຍງານໃນວັນທີ 5 ມີນານີ້ວ່າ, ທ່ານ ເຊີເກ ລາຟຣົຟ ລັດຖະມົນຕີກະຊວງການຕ່າງປະເທດຣັດເຊຍ ໄດ້ກ່າວໃນໂອກາດໃຫ້ສຳພາດຕໍ່ນັກຂ່າວວ່າ, ກົນໄກປະເທດບຣິກສ໌ ມີອິດທິພົນໃນສາກົນໄດ້ເພີ່ມຂຶ້ນຢ່າງບໍ່ຢຸດຢັ້ງ, ປະຊາຄົມໂລກມີຄວາມສົນໃຈເພີ່ມຂຶ້ນຕໍ່ປະເທດບຣິກສ໌.
ທ່ານ ລາຟຣົຟ ກ່າວວ່າ, ມະຕິທີ່ກ່ຽວຂ້ອງທີ່ຮັບຮອງພາຍໃຕ້ກົນໄກປະເທດບຣິກສ໌ ມີອິດທິພົນຫຼາຍກວ່າຂອບເຂດປະເທດບຣິກສ໌ເອງ ໂດຍສົ່ງໄປເຖິງເວທີການເມືອງແລະເສດຖະກິດສາກົນທີ່ຕ່າງກັນ, ເຮັດໃຫ້ກໍ່ຕົວເປັນລະບົບໂລກຫຼາຍຂົ້ວທີ່ທ່ຽງທຳແລະມີປະຊາທິປະໄຕຫຼາຍກວ່າເກົ່າ, ແມ່ນແບບຢ່າງຂອງການເພີ່ມທະວີການຮ່ວມມືຂອງຫຼາຍຝ່າຍແລະຮວມໝູ່ໃນວຽກງານສາກົນ.
ທ່ານ ລາຟຣົຟ ກ່າວຕື່ມວ່າ, ອາຟຣິກກາໃຕ້ ເປັນປະເທດປະທານໝູນວຽນຂອງປະເທດບຣິກສ໌ 2018, ໂດຍໃນປີນີ້, ປະເທດບຣິກສ໌ ຈະສຸມໃສ່ບັນຫາແລະສິ່ງທ້າທາຍຕົ້ນຕໍທີ່ແຜ່ນດິນໃຫຍ່ອາຟຣິກາຜະເຊີນ ແລະ ທະນາຄານພັດທະນາໃໝ່ປະເທດບຣິກສ໌ ຈະສ້າງໂອກາດໃໝ່ໃຫ້ແກ່ການລົງເລິກການເຈລະຈາກັບອາຟຣິກາ.