ກະຊວງປ້ອງກັນປະເທດຣັດເຊຍຢືນຢັນໃນວັນທີ 6 ມີນານີ້ວ່າ: ຍົນຂົນສົ່ງອານ-26 ລຳໜຶ່ງຂອງຕົນຕົກຢູ່ຖານທັບອາກາດຮະເມມິມຂອງຣັດເຊຍປະຈຳຊີຣີໃນວັນດັ່ງກ່າວ ສົ່ງຜົນເຮັດໃຫ້ທະຫານຣັດເຊຍ 39 ຄົນເສຍຊີວິດ ລວມທັງພົນຕີຄົນໜຶ່ງ.
ຂ່າວສານໂນໂວສະຕີຣັດເຊຍໄດ້ອ້າງຕາມແຫຼ່ງຂ່າວຈາກກະຊວງປ້ອງກັນປະເທດ ໂດຍລາຍງານວ່າ ຍົນຂົນສົ່ງທາງການທະຫານລຳດັ່ງກ່າວໄດ້ຕົກຂະນະພວມລົງຈອດ ແລະບ່ອນເກີດເຫດຫ່າງຈາກລານຂຶ້ນລົງຂອງຍົນປະມານ 500 ແມັດເທົ່ານັ້ນ. ຂໍ້ມູນທີ່ກ່ຽວຂ້ອງແຈ້ງວ່າ ຢູ່ເທິງຍົນມີຜູ້ໂດຍສານ 33 ຄົນ ແລະ ຈຸບິນ 6 ຄົນ ເສຍຊີວິດທັງໝົດແລ້ວ.
ຕາມການສັນນິຖານໃນເບື້ອງຕົ້ນ, ເຫດການດັ່ງກ່າວອາດຈະເກີດຂຶ້ນຍ້ອນເຄື່ອງຈັກຕິດຂັດ. ຂະນະທີ່ກະຊວງປ້ອງກັນປະເທດຣັດເຊຍ ກໍຢືນຢັນວ່າ: ບົດລາຍງານສະຖານທີ່ເກີດເຫດສະແດງໃຫ້ເຫັນວ່າ ຍົນລຳດັ່ງກ່າວບໍ່ໄດ້ຖືກໂຈມຕີແຕ່ຢ່າງໃດ ແລະເຈົ້າໜ້າທີ່ຈະສືບສວນ-ສອບສວນຫາສາເຫດທີ່ອາດຈະເປັນໄປໄດ້ທຸກຢ່າງທີ່ພາໃຫ້ເກີດເຫດດັ່ງກ່າວ.