ວັນທີ 6 ມີນານີ້, ທ່ານຈົງອຸຍຢົງ ຫົວໜ້າຄະນະທູດພິເສດສ.ເກົາຫຼີ, ຫົວໜ້າຫ້ອງການປ້ອງກັນຄວາມໝັ້ນຄົງແຫ່ງຊາດຊົງວາເດກ່າວວ່າ, ສ.ເກົາຫຼີ ແລະ ສປປ ເກົາຫຼີຕົກລົງຈະຈັດການພົບປະສຸດຍອດຢູ່ "ເຮືອນສັນຕິພາບ" ເບື້ອງສ.ເກົາຫຼີຂອງເຂດປານມຸນຈອມໃນທ້າຍເດືອນເມສາໜ້ານີ້.
ໂອກາດນີ້, ທ່ານຈົງອຸຍຢົງເປີດເຜີຍຜົນຂອງການຢ້ຽມຢາມ ສປປ ເກົາຫຼີຢູ່ຊົງວາເດໃນມື້ດຽວກັນວ່າ, ສປປ ເກົາຫຼີໄດ້ສະແດງເຖິງຄວາມມຸ່ງຫວັງທີ່ຈະບັນລຸການປອດນິວເຄຼຍຢູ່ແຫຼມເກົາຫຼີ ແລະ ມີເຈດຈຳນົງຈະເຈລະຈາກັບອາເມລິກາ. ເຈົ້າໜ້າທີ່ສປປ ເກົາຫຼີກ່າວຢ່າງຈະແຈ້ງວ່າ, ຂໍພຽງແຕ່ຢຸດຕິການຂົ່ມຂູ່ທາງການທະຫານຕໍ່ ສປປ ເກົາຫຼີ ແລະ ຮັບປະກັນຄວາມປອດໄພຂອງລະບອບສັງຄົມ ສປປ ເກົາຫຼີ, ສປປ ເກົາຫຼີບໍ່ມີເຫດຜົນຈະພັດທະນາອາວຸດນິວເຄຼຍແຕ່ຢ່າງໃດ.
ທ່ານກິມເຈິງອຸນ ຜູ້ນຳສູງສຸດ ສປປ ເກົາຫຼີໄດ້ຕ້ອນຮັບການເຂົ້າຢ້ຽມຄຳນັບຂອງຄະນະທູດພິເສດ ສ.ເກົາຫຼີ ແລະ ຈັດງານລ້ຽງອາຫານຄ່ຳ ໃນວັນທີ 5 ມີນານີ້.
 |
