ປະ​ທາ​ນາ​ທິ​ບໍ​ດີ​ຟິ​ລິບ​ປິນ​ຈະ​ບໍ່​ເຂົ້າ​ຮ່ວມກອງ​ປະ​ຊຸມ​ສຸດຍອດ​ອາ​ຊຽນ
2018-03-07 16:18:43  cri 
    ວັນ​ທີ 5 ມີ​ນານີ້, ທ່ານ ຮາ​ຣີ ໂຣ​ເຄີ ໂຄ​ສົກ​ປະ​ທາ​ນາ​ທິ​ບໍ​ດີ​ຟິ​ລິ​ບ​ປິນ​ກ່າວ​ວ່າ, ທ່ານປະ​ທາ​ນາ​ທິ​ບໍ​ດີ ໂຣດ​ຣີ​ໂກ ດູ​ເຕີ​ເຕ ​ຈະ​ບໍ່​ເຂົ້າ​ຮ່ວມກອງ​ປະ​ຊຸມ​ສຸດຍອດ​ອາ​ຊຽນ​ທີ່​ຈະ​ຈັດ​ຂຶ້ນ​ຢູ່​ອົ​ສ​ຕ​ຣາ​ລີ​ໃນ​ເດືອນນີ້.

    ຂ່າວ​ແຈ້ງວ່າ, ຍ້ອນ​ສົງ​ຄາມ​ປາບ​ປາມ​ຢາ​ເສບ​ຕິດ​ພາຍ​ໃນ​ປະ​ເທດ, ທ່ານ ດູ​ເຕີ​ເຕ ພວມ​ຖືກ​ປະ​ຊາ​ຄົມ​ໂລກຕຳ​ໜິ. ກ່ອນ​ໜ້ານີ້, ທ່ານ​ເຄີຍ​ກ່າວ​ວ່າ ຕົນ​ຈະ​ບໍ່​ຮ່ວມ​ມື​ກັບ​ຜູ້​ສືບ​ສວນ​ຂອງ​ອົງ​ການ​ສະ​ຫະ​ປະ​ຊາ​ຊາດ​ໃນ​ການ​ສືບ​ສວນ​ເຫດ​ການ​ປະ​ຫານ​ຊີ​ວິດຫຼາຍ​ພັນ​ຄົນ​ແຕ່​ບໍ່​ໄດ້​ຜ່ານ​ກົດ​ໝາຍ​ໃນ​ການ​ເຄື່ອນ​ໄຫວ​ປາບ​ປາມ​ຢາ​ເສບ​ຕິດ.

    ທ່ານ ຮາ​ຣີ ໂຣ​ເກີ ໃຫ້​ສຳ​ພາດ​ຕໍ່​ນັກ​ຂ່າວ​ວ່າ: "ການ​ພັດ​ທະ​ນາ​ພາຍ​ໃນ​ປະ​ເທດ ຕ້ອງ​ການ​ປະ​ທານ​ທິ​ບໍ​ດີ​ຢູ່​ຟິ​ລິບ​ປິນ." ຂ່າວ​ແຈ້ງຕື່ມ​ອີກວ່າ, ທ່ານ ດູ​ເຕີ​ເຕ ຈະ​ແຕ່ງ​ຕັ້ງ​ລັດ​ຖະ​ມົນ​ຕີ​ການ​ຕ່າງ​ປະ​ເທດ​ເປັນ​ຜູ້​ຕາງໜ້າ​ທ່ານ​ເຂົ້າ​ຮ່ວມກອງ​ປະ​ຊຸມ​ສຸດຍອດ​ອາ​ຊຽນ​ທີ່​ອົ​ສ​ຕ​ຣາ​ລີ, ສ່ວນ​ທ່ານ​ເອງ​ຈະ​ໄປ​ເຂົ້າ​ຮ່ວມ​ພິ​ທີ​​ມອບ​ໃບ​ປ​ະ​ກາດ​ສະ​ນີ​ຍະ​ບັດຂອງວິ​ທະ​ຍາ​​ຄານ​ການ​ທະ​ຫານ​ຟິ​ລິບ​ປິນ ເພື່ອ​ບັນ​ລະ​ຍາຍ​ການ​ຕໍ່​ສູ້​ກັບ "ລັດ​ທິກໍ່​ການ​ຮ້າຍ​ຍຸກ​ປັດ​ຈຸ​ບັນ" ໃຫ້​ເຈົ້າ​ໜ້າ​ທີ່​ໜຸ່ມ​ໃນ​ໂອ​ກາດ​ດັ່ງ​ກ່າວ.
ຂ່າວ-ບົດທີ່ກ່ຽວຂ້ອງ
ຜູ້ດຳເນີນລາຍການ