ວັນທີ 11 ມີນານີ້, ຫ້ອງການຄະນະກຳມະການວຽກງານປູກຕົ້ນໄມ້ຕົ້ນຫຍ້າແຫ່ງລັດຈີນໄດ້ປະກາດ "ແຈ້ງການກ່ຽວກັບສະພາບການປູກຕົ້ນໄມ້ຕົ້ນຫຍ້າຂອງຈີນປີ 2017" ໂດຍສະແດງໃຫ້ເຫັນວ່າ, ວຽກງານປູກຕົ້ນໄມ້ຕົ້ນຫຍ້າຂອງຈີນໄດ້ຮັບຜົນງານໃໝ່, ຄື ປີ 2017 ໃນທົ່ວປະເທດຈີນໄດ້ປູກຕົ້ນໄມ້ 7.362.000 ເຕັກຕາ, ປົວລະປັດຮັກສາປ່າໄມ້ 8.302.000ເຮັກຕາ.
ໃນແຈ້ງການດັ່ງກ່າວຂຽນວ່າ, ປີ 2017 ກິດຈະກຳສະໝັກປູກຕົ້ນໄມ້ທົ່ວປວງຊົນໄດ້ກ້າວໄປໜ້າຢ່າງໜັກແໜ້ນ, ຢູ່ແຫ່ງຕ່າງໆຂອງຈີນໄດ້ດຳເນີນກິດຈະກຳສະໝັກປູກຕົ້ນໄມ້ພາຍໃຕ້ຫົວຂໍ້ ແລະຮູບການຕ່າງໆ. ການເຄື່ອນໄຫວປູກຕົ້ນໄມ້ໄດ້ດຳເນີນໄປຢ່າງຂະໜາດໃຫຍ່, ແຫ່ງຕ່າງໆໄດ້ຈັດມີການໂຄສະນາ ເພື່ອປຸກລະດົມປະຊາຊົນເຂົ້າຮ່ວມຢ່າງກວ້າງຂວາງ, ແລະປາກົດມີບັນຍາກາດທີ່ທົ່ວສັງຄົມເຂົ້າຮ່ວມການປູກຕົ້ນໄມ້ຕົ້ນຫຍ້າຢ່າງຄຶກຄື້ນ. ພ້ອມກັນນັ້ນ, ໂຄງການລະບົບນິເວດປ່າໄມ້ໄດ້ຮັບການປະຕິບັດເທື່ອລະກ້າວຢ່າງໝັ້ນທ່ຽງ. ປ່າທຳມະຊາດຂອງລັດໃນທົ່ວປະເທດລ້ວນແຕ່ຖືກຈັດເຂົ້າໃນຂອບເຂດສະຫງວນປ່າທຳມະຊາດ, ອັດຕາປົກຄຸມດ້ວຍຕົ້ນໄມ້ຕົ້ນຫຍ້າຢູ່ຊົນນະບົດກໍເພີ່ມຂຶ້ນຕື່ມອີກ, ລະດັບປູກຕົ້ນໄມ້ຕົ້ນຫຍ້າສູງຂຶ້ນເລື້ອຍໆ, ເຊິ່ງໄດ້ປັບປຸງສະພາບແວດລ້ອມການດຳລົງຊີວິດຂອງເຂດຊົນນະບົດໃຫ້ດີຂຶ້ນ.