(ກະຊວງການຄ້າຈີນ: ຈີນຈະບໍ່ເປັນເຈົ້າການກໍ່ສົງຄາມການຄ້າ)
ຕາມຂ່າວ CRI: ຫວ່າງມໍ່ໆນີ້ ການພົວພັນເສດຖະກິດການຄ້າລະຫວ່າງຈີນ-ອາເມລິກາເກີດຄວາມປັ່ນປ່ວນເລື້ອຍໆ, ຈີນ-ອາເມລິກາຈະເກີດສົງຄາມການຄ້າຫຼືບໍ ເຮັດໃຫ້ທົ່ວໂລກໃຫ້ຄວາມສົນໃຈທີ່ສຸດ. ວັນທີ 11 ມີນານີ້ ທ່ານຈົ່ງຊານ ລັດຖະມົນຕີກະຊວງການຄ້າຈີນກ່າວຢູ່ທີ່ນະຄອນຫຼວງປັກກິ່ງວ່າ, ຈີນບໍ່ຢາກໃຫ້ເກີດສົງຄາມການຄ້າ ແລະຈະບໍ່ເປັນເຈົ້າການກໍ່ສົງຄາມການຄ້າ, ແຕ່ສາມາດຮັບມືກັບສິ່ງທ້າທາຍຕ່າງໆ.
ໃນກອງປະຊຸມຂ່າວທີ່ຈັດຂຶ້ນຢູ່ສູນຖະແຫຼງຂ່າວຂອງກອງປະຊຸມໃຫຍ່ຄັ້ງທຳອິດຂອງສະພາຜູ້ແທນປະຊາຊົນແຫ່ງຊາດຈີນຊຸດທີ 13 ໃນມວັນທີ 11 ມີນານີ້ ທ່ານຈົ່ງຊານກ່າວເນັ້ນວ່າ: "ສົງຄາມການຄ້າຈະມີຜູ້ໄດ້ຮັບໄຊຊະນະທັງນັ້ນ, ພຽງແຕ່ຈະນຳເອົາໄພພິບັດມາໃຫ້ຈີນ ອາເມລິກາກໍ່ຄືໃຫ້ໂລກ. ສະນັ້ນຈີນບໍ່ຢາກໃຫ້ມີສົງຄາມການຄ້າ ແລະຈະບໍ່ເປັນເຈົ້າການກໍ່ສົງຄາມການຄ້າ. ແຕ່ພວກເຮົາແມ່ນມີຄວາມສາມາດໃນການຮັບມືກັບສິ່ງທ້າທາຍຕ່າງໆ, ເດັດດ່ຽວປົກປັກຮັກສາຜົນປະໂຫຍດແຫ່ງຊາດແລະຂອງປະຊາຊົນ."
ໃນ 40 ປີມານີ້ ການຄ້າຈີນ-ອາເມລິກາໄດ້ເພີ່ມຂຶ້ນ 232 ເທົ່າ, ການລົງທຶນເຊິ່ງກັນແລະກັນລະຫວ່າງສອງປະເທດໄດ້ຫຼາຍກວ່າ 230 ຕື້ໂດລາສະຫະລັດ. ທ່ານຈົ່ງຊານເຫັນວ່າ, ນີ້ສະແດງໃຫ້ເຫັນຢ່າງເຕັມສ່ວນວ່າເສດຖະກິດສອງປະເທດມີທ່າແຮງເຊິ່ງກັນແລະກັນ, ແລະກຳລັງບົ່ມຊ້ອນໃນການຮ່ວມມືກັນກໍ່ມີຢູ່ແຫ່ງຫຼວງຫຼາຍ.
ທ່ານຈົ່ງຊານຍັງເປີດເຜີຍຕໍ່ສື່ມວນຊົນທັງພາຍໃນແລະຕ່າງປະເທດໃຫ້ຮູ້ວ່າ, ການສົນທະນາທາງເສດຖະກິດຮອບດ້ານລະຫວ່າງຈີນ-ອາເມລິກາບໍ່ໄດ້ຂາດສະບັ້ນໄປ, ສອງປະເທດນີ້ຈະສືບຕໍ່ເຈລະຈາກັນກ່ຽວກັບບັນຫາການຄ້າສອງຝ່າຍ.
