ສື່ມວນຊົນອັງກິດລາຍງານວ່າ: ໃນເດືອນຜ່ານມາ, ກະຊວງຍຸຕິທຳຟິລິບປິນໄດ້ແຈ້ງບັນຊີລາຍຊື່ພວກກະບົດທີ່ມີການເຄື່ອນໄຫວກໍ່ການຮ້າຍເພື່ອທຳລາຍລັດຖະບານສະບັບໜຶ່ງ ໃນນີ້ລວມທັງພະນັກງານລາຍງານສິດທິມະນຸດພິເສດຂອງອົງການສະຫະປະຊາຊາດຄົນໜຶ່ງ. ຕໍ່ເລື່ອງດັ່ງກ່າວ, ທ່ານເຊອິດ ຮາອັດ ອານ ຮູເຊອິນ ຂ້າຫຼວງໃຫຍ່ອົງການສະຫະປະຊາຊາດ ເພື່ອກິດຈະການສິດທິມະນຸດ ໄດ້ປະນາມທ່ານໂຣດຣີໂກ ດູເຕີເຕ ປະທານາທິບໍດີຟິລິບປິນວ່າຄວນຮັບການກວດກາສຸຂະພາບຈິດ.
ຕໍ່ກໍລະນີດັ່ງກ່າວ, ໃນພິທິຖະແຫຼງຂ່າວທີ່ຈັດຂຶ້ນໃນວັນທີ 12 ມີນານີ້, ທ່ານລູ້ຄ່າງ ໂຄສົກກະຊວງການຕ່າງປະເທດຈີນ ກ່າວວ່າ: ນັບແຕ່ທ່ານດູເຕີເຕ ດຳລົງຕຳແໜ່ງປະທານາທິບໍດີຟິລິບປິນເປັນຕົ້ນມາ, ທ່ານໄດ້ຕັ້ງໜ້າປາບປາມອາຊະຍາກຳທີ່ຕິດພັນກັບຢາເສບຕິດ ແລະ ລັດທິກໍ່ການຮ້າຍ, ພັດທະນາເສດຖະກິດ, ປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ, ໄດ້ປົກປັກຮັກສາ ແລະ ຊຸກຍູ້ພື້ນຖານສິດທິມະນຸດຂອງປະຊາຊົນຟິລິບປິນ ເຊັ່ນ ຄວາມປອດໄພ ແລະການພັດທະນາ ແລະໄດ້ຮັບການຮັບຮອງແລະສະໜັບສະໜູນຢູ່ພາຍໃນປະເທດຟິລິບປິນເປັນຢ່າງສູງ. ສະນັ້ນ, ບັນດາຝ່າຍຂອງປະຊາຄົມໂລກ ລວມທັງຫ້ອງການຂ້າຫຼວງໃຫຍ່ອົງການສະຫະປະຊາຊາດເພື່ອກິດຈະການສິດທິມະນຸດ ຄວນຍອມຮັບຄວາມປາຖະໜາຂອງປະຊາຊົນຟິລິບປິນຢ່າງຖືກຕ້ອງ ເບິ່ງຜົນໄດ້ຮັບໃນການປາບປາມຢາເສບຕິດ ແລະຕ້ານລັດທິກໍ່ການຮ້າຍຂອງຟິລິບປິນຢ່າງຮອບດ້ານ, ຍຸຕິທຳ ແລະພາວະວິໄສ, ສະໜັບສະໜູນຟິລິບປິນທີ່ພະຍາຍາມຊຸກຍູ້ພາລະກິດສິດທິມະນຸດໂດຍອີງຕາມສະພາບຂອງປະເທດຕົນ. ໃນຖານະເປັນອົງການສະເພາະກິດຂອງອົງການສະຫະປະຊາຊາດ ຄວນປະຕິບັດໜ້າທີ່ຂອງຕົນໃນຂອບທີ່ເຄົາລົບຈຸດປະສົງ ແລະຫຼັກການ "ກົດບັດສະຫະປະຊາຊາດ".