ທ່ານເຕຍບັນ ຮອງນາຍົກລັດຖະມົນຕີ ທັງເປັນລັດຖະມົນຕີກະຊວງປ້ອງກັນປະເທດກຳປູເຈຍ ກ່າວໃນວັນທີ 12 ມີນານີ້ວ່າ: ກຳປູເຈຍຈະເປີດຊຸດອົບຮົມເຕັກນິກເກັບກູ້ລະເບີດບໍ່ທັນແຕກໂດຍຫັນໜ້າສູ່ປະເທດໃນອາຊຽນ ແລະ ປະເທດອື່ນໆ ເພື່ອແບ່ງປັນບົດຮຽນຂອງຕົນກັບໂລກ ປົກປັກຮັກສາສັນຕິພາບໂລກ.
ປັດຈຸບັນ, ໃນປະເທດກຳປູເຈຍຍັງມີ "ເຂດທີ່ສົງໄສວ່າມີລະເບີດແລະລູກປືນໃຫຍ່ບໍ່ທັນແຕກ" ກວມເນື້ອທີ່ກວ້າງ 1.700 ກິໂລຕາແມັດ ແລະ ຄາດວ່າຈະສາມາດເກັບກູ້ໄດ້ໝົດເມື່ອຮອດປີ 2025.
ທ່ານເຕຍບັນ ກ່າວຕື່ມວ່າ: ການເປີດຊຸດອົບຮົມເຕັກນິກເກັບກູ້ລະເບີດບໍ່ທັນແຕກ ແມ່ນມາດຕະການໃໝ່ຂອງກະຊວງປ້ອງກັນປະເທດກຳປູເຈຍໃນການປົກປັກຮັກສາສັນຕິພາບ ແລະທັງເປັນຄວາມພາກພູມໃຈຂອງກຳປູເຈຍອີກດ້ວຍ ໂດຍຜ່ານການເປີດຊຸດອົບຮົມດັ່ງກ່າວ ຈະເຮັດໃຫ້ໂລກຮັບຮອງເຕັກນິກການເກັບກູ້ລະເບີດບໍ່ທັນແຕກຂອງກຳປູເຈຍ ແລະປົກປັກຮັກສາສັນຕິພາບຂອງໂລກ.