ວັນທີ 13 ມີນານີ້, ທ່ານລູ້ຄ່າງ ໂຄສົກກະຊວງການຕ່າງປະເທດຈີນກ່າວໃນກອງປະຊຸມຂ່າວວ່າ: ຈີນເດັດດ່ຽວສຸມໃສ່ເປົ້າໝາຍໃຫ້ແຫຼມເກົາຫຼີປອດນິວເຄຼຍ, ເດັດດ່ຽວສຸມໃສ່ການໃຫ້ແຫຼມເກົາຫຼີມີສັນຕິພາບ ແລະຄວາມໝັ້ນຄົງ ແລະເດັດດ່ຽວສຸມໃສ່ການແກ້ໄຂໂດຍການເຈລະຈາ. ຈີນຈະສືບຕໍ່ເສີມຂະຫຍາຍບົດບາດພິເສດ, ຊຸກຍູ້ໃຫ້ບັນດາຝ່າຍເລີ່ມດຳເນີນການເຈລະຈາ, ເຈລະຈາກັນໄປໃຫ້ໄດ້ຮັບໝາກຜົນທີ່ດີ ຄື ເຮັດໃຫ້ແຫຼມເກົາມີສັນຕິພາບ, ຄວາມໝັ້ນຄົງ ແລະປອດນິວເຄຼຍ.
ທ່ານກ່າວຕື່ມວ່າ: ບັນຫານິວເຄຼຍແຫຼມເກົາຫຼີມີໂອກາດແກ້ໄຂໂດຍການເຈລະຈາຄືນໃໝ່, ຕ້ອງໄດ້ໃຫ້ກຳລັງໃຈ ແລະສະໜັບສະໜູນ. ຈີນຮູ້ສຶກດີໃຈຫຼາຍທີ່ທ່ານໂດນານ ທຣຳ ປະທານາທິບໍດີອາເມລິກາ ໄດ້ກ່າວວ່າ: ຫວັງວ່າບັນຫານິວເຄຼຍແຫຼມເກົາຫຼີຈະສາມາດແກ້ໄຂໂດຍສັນຕິໄດ້ໃນທີ່ສຸດ.
ທ່ານຈູງອຸຍຢົງ ທູດພິເສດປະທານາທິບໍດີ ສ ເກົາຫຼີໄດ້ຢ້ຽມຢາມປະເທດຈີນໃນວັນທີ 12 ມີນານີ້ ເພື່ອແລກປ່ຽນຢ່າງເລິກເຊິ່ງກັບຝ່າຍຈີນກ່ຽວກັບສະພາບການທີ່ທ່ານໄດ້ຢ້ຽມຢາມ ສປປ ເກົາຫຼີ ແລະອາເມລິກາ. ທ່ານສີຈິ້ນຜິງ ປະທານປະເທດຈີນໄດ້ສົນທະນາຜ່ານທາງໂທລະສັບກັບປະທານາທິບໍດີອາເມລິກາ, ໂດຍປະມຸກລັດຈີນ-ອາເມລິກາໄດ້ແລກປ່ຽນກັນກ່ຽວກັບສະພາບການໃໝ່ສຸດຂອງແຫຼມເກົາຫຼີ.
 |
