ວັນທີ 17 ມີນານີ້ໃນໂອກາດຕອບຄຳຖາມຂອງນັກຂ່າວ, ທ່ານລູ້ຄ່າງ ໂຄສົກກະຊວງການຕ່າງປະເທດຈີນກ່າວວ່າ, ຈີນຄັດຄ້ານລັດຖະບານອາເມລິກາລົງນາມໃນ "ຍັດຕິວ່າດ້ວຍການໄປມາຫາສູ່ກັນກັບໄຕ້ຫວັນ", ແລະໄດ້ຕໍ່ວ່າທັກທ້ວງຢ່າງຮຸນແຮງກັບອາເມລິກາຢ່າງເປັນທາງການ.
ທັງນີ້ໃນວັນດັ່ງກ່າວມີນັກຂ່າວຖາມວ່າ, ຕາມຂ່າວແຈ້ງວ່າ, ລັດຖະບານອາເມລິກາໄດ້ລົງນາມໃນ "ຍັດຕິວ່າດ້ວຍການໄປມາຫາສູ່ກັນກັບໄຕ້ຫວັນ", ຈີນມີຄວາມເຫັນຫຍັງຕໍ່ເລື່ອງນີ້?
ທ່ານລູ້ຄ່າງ ກ່າວວ່າ, ຍັດຕິດັ່ງກ່າວໄດ້ລະເມີດຫຼັກການປະເທດຈີນດຽວແລະຂໍ້ກຳນົດຂອງຖະແຫຼງການຮ່ວມຈີນ-ອາເມລິກາສາມສະບັບຢ່າງໜັກໜ່ວງ, ເປັນການສົ່ງສັນຍານທີ່ຜິດພາດແລະໜັກໜ່ວງຕໍ່ອິດທິກຳລັງແບ່ງແຍກໄຕ້ຫວັນ. ຈີນເຕືອນໃຫ້ອາເມລິກາປ່ຽນແປງຄວາມຜິດພາດຂອງຕົນ, ແກ້ໄຂບັນຫາກ່ຽວກັບໄຕ້ຫວັນຢ່າງເໝາະສົມແລະລະມັດລະວັງ, ເພື່ອຫຼີກເວັ້ນບໍ່ໃຫ້ທຳລາຍສາຍພົວພັນລະຫວ່າງຈີນ-ອາເມລິກາແລະສັນຕິພາບແລະສະຖຽນລະພາບຢູ່ເຂດຊ່ອງແຄບໄຕ້ຫວັນ.
 |
