ທ່ານສີຈິ້ນຜິງສົນທະນາຜ່ານທາງໂທລະສັບກັບທ່ານນາງເມີແຄວ

ວັນທີ 17 ມີນານີ້, ທ່ານສີຈິ້ນຜິງ ປະທານປະເທດຈີນແລະທ່ານນາງແອງເຈີລາ ເມີແຄວ ນາຍົກລັດຖະມົນຕີເຢຍລະມັນໄດ້ສົນທະນາກັນຜ່ານທາງໂທລະສັບ.

ທ່ານນາງເມີແຄວ ຊົມເຊີຍທ່ານສີຈິ້ນຜິງ ໄດ້ຮັບການເລືອກຕັ້ງເປັນປະທານປະເທດຈີນຊຸດໃໝ່ຕື່ມອີກວາລະໜຶ່ງ, ແລະກ່າວວ່າລັດຖະບານເຢຍລະມັນຊຸດໃໝ່ຈະສຸມກຳລັງເພື່ອສືບຕໍ່ຂະຫຍາຍສາຍພົວພັນເຢຍລະມັນແລະຈີນທີ່ໃກ້ຊິດກວ່າເກົ່າ. ເຢຍລະມັນສະໜັບສະໜູນຂໍ້ລິເລີ່ມ "ໜຶ່ງແລວໜຶ່ງເສັ້ນທາງ" ແຕ່ຕົ້ນຕະຫຼອດປາຍ, ຍິນດີປະກອບສ່ວນເຂົ້າໃນການສ້າງ "ໜຶ່ງແລວໜຶ່ງເສັ້ນທາງ" ໂດຍຜ່ານໂຄງການຮ່ວມມື. ເຢຍລະມັນສະໜັບສະໜູນລົງເລິກການຮ່ວມມືລະຫວ່າງເອີລົບແລະຈີນ, ຍິນດີເພີ່ມທະວີການຮ່ວມມືກັບຈີນພາຍໃຕ້ຂອບຫຼາຍຝ່າຍເຊັ່ນກຸ່ມ 20 ປະເທດແລະອື່ນໆ, ຮ່ວມກັນຮັກສາລະບຽບການຫຼາຍຝ່າຍ.

ທ່ານສີຈິ້ນຜິງ ຊົມເຊີຍທ່ານນາງເມີແຄວໄດ້ຮັບການເລືອກຕັ້ງໃຫ້ດຳລົງຕຳແໜ່ງນາຍົກລັດຖະມົນຕີເຢຍລະມັນເປັນສະໄໝທີ 4. ທ່ານສີຈິ້ນຜິງ ຊີ້ໃຫ້ເຫັນວ່າ, ຈີນແລະເຢຍລະມັນແມ່ນປະເທດໃຫຍ່ໃນໂລກແລະເປັນກຳລັງສຳຄັນໃນການຮັກສາຄວາມໝັ້ນທ່ຽງ, ຈີນໃຫ້ຄວາມສຳຄັນສູງຕໍ່ການຂະຫຍາຍສາຍພົວພັນກັບເຢຍລະມັນເຊັ່ນດຽວກັນ. ສອງປະເທດຄວນກາຍເປັນແບບຢ່າງຂອງການຮ່ວມມືຕ່າງຝ່າຍຕ່າງມີຜົນປະໂຫຍດ, ຄວນສືບຕໍ່ເປັນຜູ້ນຳໜ້າຂອງການພົວພັນລະຫວ່າງຈີນ-ເອີລົບ, ຄວນກາຍເປັນຜູ້ຊຸກຍູ້ການພົວພັນສາກົນແບບໃໝ່, ນອກນີ້, ສອງປະເທດຍັງຄວນກາຍເປັນຄູ່ຮ່ວມມືທີ່ກ້າວລ້ຳຄວາມແຕກຕ່າງກັນດ້ານຮູບຖານຈິດສຳນຶກ. ຈີນແລະເຢຍລະມັນແມ່ນຄູ່ຮ່ວມມືຫາກບໍ່ແມ່ນຄູ່ແຂ່ງ, ການພັດທະນາຂອງຕົນເປັນໂອກາດຫາກບໍ່ແມ່ນການທ້າທາຍຕໍ່ກັນ.

ຜູ້ນຳສອງປະເທດຍັງໄດ້ແລກປ່ຽນຄວາມເຫັນກ່ຽວກັບບັນຫາທີ່ສອງຝ່າຍສົນໃຈຮ່ວມກັນເຊັ່ນລະບຽບການຄ້າສາກົນແລະອື່ນໆ.