ແນໃສ່ກໍລະນີທີ່ອາເມລິກາເຊັນ "ຍັດຕິກົດໝາຍກ່ຽວກັບການໄປມາຫາສູ່ກັບໄຕ້ຫວັນ", ທ່ານ ລິວຊ່ຽງພິງ ຫົວໜ້າສະຖາບັນຄົ້ນຄວ້າໄຕ້ຫວັນມະຫາວິທະຍາໄລນານກິ່ງ ເຫັນວ່າ, ພາຍໃຕ້ສະພາບການປັດຈຸບັນທີ່ທາງການໄຕ້ຫວັນຂອງພັກກ້າວໜ້າປະຊາທິປະໄຕ ບໍ່ຮັບຮູ້ "ຄວາມເປັນເອກະພາບກັນໃນປີ 1992" ທີ່ສະແດງໃຫ້ເຫັນເຖິງເນື້ອໃນຫຼັກການປະເທດຈີນດຽວ ແລະ ສະຖານະການການພົວພັນການເມືອງລະຫວ່າງສອງຝັ່ງເຄັ່ງຕຶງຫຼາຍນັ້ນ, ອາເມລິກາໄດ້ປະກາດໃຊ້ "ຍັດຕິກົດໝາຍກ່ຽວກັບການໄປມາຫາສູ່ກັບໄຕ້ຫວັນ" ທັງນີ້ເປັນການຍຸຍົງແລະປ່ອຍໄປຕາມໃຈຕໍ່ອິດທິກຳລັງ "ແບ່ງແຍກໄຕ້ຫວັນໃຫ້ເປັນເອກະລາດ", ເຊິ່ງໄດ້ເພີ່ມຄວາມກັງວົນໃຈທີ່ເຮັດໃຫ້ປະຊາຊົນບໍ່ມີຄວາມສະຫງົບທາງຈິດໃຈຕໍ່ການພົວພັນສອງຝັ່ງ ແລະຍິ່ງຈະເຮັດໃຫ້ສະຖານະການຊ່ອງແຄບໄຕ້ຫວັນມີຄວາມປັ່ນປ່ວນຮຸນແຮງຂຶ້ນເລື້ອຍໆ.
ທ່ານ ລິວຊ່ຽງພິງ ເຫັນວ່າ, ການທີ່ອາເມລິກາປະກາດໃຊ້ຍັດຕິກົດໝາຍດັ່ງກ່າວ ມີຈຸດປະສົງເພື່ອນຳໃຊ້ບັນຫາໄຕ້ຫວັນມາສະກັດກັ້ນການພັດທະນາແລະການຟື້ນຟູຄວາມຈະເລີນຮຸ່ງເຮືອງຄືນໃໝ່ຂອງຈີນ, ນີ້ຄືຄວາມໃຈດຳອຳມະຫິດທີ່ສຸດ ແຕ່ບໍ່ສາມາດບັນລຸຜົນເປັນຈິງໄດ້. ບັນຫາໄຕ້ຫວັນ ແມ່ນເລື່ອງພາຍໃນຂອງຈີນ, ແມ່ນຜົນປະໂຫຍດໃຈກາງຂອງຈີນ, ປະຊາຊົນຈີນມີສິດຕັດສິນໃຈແລະມີຄວາມສາມາດແກ້ໄຂບັນຫາໄຕ້ຫວັນຢ່າງເຖິງຖອງ, ປະເທດໃດກໍຕາມ ລ້ວນແຕ່ບໍ່ສາມາດບັງຄັບໃຫ້ຈີນຍອມຮັບການແບ່ງແຍກດິນແດນຂອງຕົນໄດ້ຢ່າງເດັດຂາດ.