ວັນທີ 21 ມີນານີ້, ທ່ານຫຼີເຄີ້ສຽງ ນາຍົກລັດຖະມົນຕີຈີນເປັນປະທານກອງປະຊຸມສະໄໝສາມັນຂອງຄະນະລັດຖະບານໂດຍກຳນົດການແບ່ງຄວາມຮັບຜິດຊອບທີ່ສຳຄັນຂອງບົດລາຍງານວຽກງານລັດຖະບານ ແລະຈາກນີ້,ຄະນະລັດຖະບານຈີນຊຸດໃໝ່ໄດ້ເລີ່ມປະຕິບັດໜ້າທີ່ຂອງຕົນຢ່າງຮອບດ້ານ.
ກອງປະຊຸມໄດ້ຈັດແບ່ງຄວາມຮັບຜິດຊອບສຳຄັນ 12 ດ້ານຈຳນວນ 57 ປະການ ຕາມທີ່ລະບຸໄວ້ໃນບົດລາຍງານວຽກງານລັດຖະບານ ໂດຍຮຽກຮ້ອງໃຫ້ທຸກພາກສ່ວນ,ທຸກໜ່ວຍງານປະຕິບັດໜ້າທີ່ຕຳແໜ່ງຕາມກົດໝາຍຢ່າງດຸໝັ່ນແລະມີຄວາມຮັບຜິດຊອບສູງ, ສ້າງຕັ້ງລະບຽບຈັດຕັ້ງປະຕິບັດໜ້າທີ່ວຽກງານໃຫ້ເປັນຮູບປະທຳ, ການນຳສູງສຸດຕ້ອງຮັບຜິດຊອບລວມດ້ວຍຕົນເອງ, ເລັ່ງລັດສ້າງແຜນງານຊຸກຍູ້ວຽກງານສຳຄັນເພື່ອຮັບປະກັນໃຫ້ທຸກວຽກງານຕ້ອງມີມາດຕະການປະຕິບັດ,ມີແຜນການດຳເນີນງານ,ມີຄົນຮັບຜິດຊອບ. ສຳລັບມາດຕະການສຳຄັນທີ່ຕະຫຼາດແລະປະຊາຊົນຄາດຫວັງຢ່າງຍິ່ງນັ້ນຕ້ອງເລັ່ງລັດປະກາດໃຊ້, ເພີ່ມທະວີການຕິດຕາມກວດກາ,ຮັບປະກັນການປະຕິບັດໃຫ້ເປັນຮູບປະທຳແລະມີປະສິດທິຜົນ, ຮັບປະກັນເຮັດຫຼ້ອນໜ້າທີ່ເປົ້າໝາຍສຳຄັນແຫ່ງການພັດທະນາເສດຖະກິດສັງຄົມປະຈຳປີ ເພື່ອໃຫ້ຄະນະລັດຖະບານຊຸດໃໝ່ເລີ່ມເຄື່ອນໄຫວປະຕິບັດໜ້າທີ່ໄດ້ເປັນຢ່າງດີ.