ຕອນບ່າຍວັນທີ 21 ມີນານີ້ ຢູ່ນະຄອນຫຼວງປັກກິ່ງ, ທ່ານ ວາງຢີ້ ທີ່ປຶກສາແຫ່ງລັດ ທັງເປັນລັດຖະມົນຕີກະຊວງການຕ່າງປະເທດຈີນ ໄດ້ພົບປະເຈລະຈາກັບທ່ານ ອາລັນ ຄາຢາທາໂນ ລັດຖະມົນຕີກະຊວງການຕ່າງປະເທດຟິລິບປິນທີ່ມາຢ້ຽມຢາມຈີນ. ສອງຝ່າຍກ່າວເນັ້ນວ່າ, ປັດຈຸບັນ, ການພົວພັນຈີນ-ຟິລິບປິນໄດ້ເຂົ້າສູ່ໄລຍະທີ່ດີທີ່ສຸດໃນຊຸມປີຜ່ານມາ, ຝ່າຍຕ່າງໆຄວນຕັ້ງໜ້າຜັນຂະຫຍາຍຄວາມເປັນເອກະພາບກັນຂອງປະມຸກລັດສອງປະເທດ, ລົງເລິກການຮ່ວມມືທີ່ແທດເໝາະກັບຕົວຈິງໃນທຸກຂົງເຂດ, ຕັ້ງໜ້າຊຸກຍູ້ການເຈລະຈາແລະການຮ່ວມມືທາງທະເລ ແລະ ຊຸກຍູ້ການພົວພັນສອງຝ່າຍໃຫ້ຂະຫຍາຍກ້າວສູ່ລວງເລິກຢ່າງບໍ່ຢຸດຢັ້ງ.
ທ່ານ ຄາຢາທາໂນ ແມ່ນລັດຖະມົນຕີການຕ່າງປະເທດຜູ້ທຳອິດທີ່ມາຢ້ຽມຢາມຈີນພາຍຫຼັງຈີນສ້າງຕັ້ງລັດຖະບານຊຸດໃໝ່. ກ່ອນພົບປະເຈລະຈາໃນມື້ດັ່ງກ່າວ, ທ່ານ ຄາຢາທາໂນ ໄດ້ຝາກຈົດໝາຍຊົມເຊີຍຂອງທ່ານ ໂຣດຣີໂກ ດູເຕີເຕ ປະທານາທິບໍດີຟິລິບປິນໄປຍັງທ່ານປະທານ ສີຈິ້ນຜິງ ໃຫ້ທ່ານ ວາງຢີ້ ທີ່ຫາກໍດຳລົງຕຳແໜ່ງທີ່ປຶກສາແຫ່ງລັດ ແລະລັດຖະມົນຕີກະຊວງການຕ່າງປະເທດຈີນ, ທັງສະແດງຄວາມຊົມເຊີຍຕໍ່ຈີນໄຂກອງປະຊຸມສອງສະພາຢ່າງສຳເລັດຜົນ.
ທ່ານ ຄາຢາທາໂນ ກ່າວວ່າ, ພາຍໃຕ້ການນຳພາຂອງຜູ້ນຳສອງຝ່າຍ, ສາຍພົວພັນຟິລິບປິນ-ຈີນໄດ້ຮັບການຂະຫຍາຍຕົວຢ່າງໃຫຍ່ຫຼວງໃນຊຸມປີຜ່ານມາ. ລັດຖະບານຕົນໃຫ້ຄວາມສຳຄັນສູງຕໍ່ການພົວພັນຟິລິບປິນ-ຈີນ, ສະໜັບສະໜູນຂໍ້ລິເລີ່ມ "ໜຶ່ງແລວໜຶ່ງເສັ້ນທາງ" ຂອງຈີນ. ຄຽງຄູ່ກັບການພົວພັນສອງປະເທດກ້າວສູ່ລວງເລິກຢ່າງຕໍ່ເນື່ອງ, ປະເທດຕົນຍິນດີຮັດແໜ້ນການຮ່ວມມືກັບຈີນ ແລະຮ່ວມກັນຮັບມືກັບສິ່ງທ້າທາຍ.
ທ່ານ ວາງຢີ້ ກ່າວວ່າ, ປັດຈຸບັນ, ການພົວພັນຈີນ-ຟິລິບປິນ ໄດ້ເຂົ້າສູ່ໄລຍະທີ່ດີທີ່ສຸດໃນຊຸມປີຜ່ານມາ. ການໄປມາຫາສູ່ກັນລະຫວ່າງການນຳຂັ້ນສູງສອງປະເທດນັບມື້ນັບແໜ້ນແຟ້ນຂຶ້ນ, ຄວາມໄວ້ເນື້ອເຊື່ອໃຈດ້ານການເມືອງໄດ້ເພີ່ມທະວີຢ່າງຕໍ່ເນື່ອງ, ການຮ່ວມມືໃນທຸກຂົງເຂດເຊິ່ງລວມທັງເສດຖະກິດການຄ້າ ໄດ້ຮັບການຟື້ນຟູແລະຂະຫຍາຍຕົວ ເຊິ່ງໄດ້ສ້າງຜົນປະໂຫຍດຕົວຈິງໃຫ້ແກ່ສອງປະເທດແລະປະຊາຊົນສອງຊາດ.
ໃນມື້ດຽວກັນ, ທ່ານ ວາງຢີ້ ແລະທ່ານ ຄາຢາທາໂນ ຍັງໄດ້ປຶກສາຫາລືບັນຫາກ່ຽວກັບການເພີ່ມທະວີການຮ່ວມມືຕື່ມອີກ. ທ່ານ ວາງຢີ້ ກ່າວວ່າ, ການທີ່ແກ້ໄຂບັນຫາທະເລຈີນໃຕ້ຜ່ານການສົນທະນາແລະປຶກສາຫາລືຢ່າງເໝາະສົມ, ປົກປັກຮັກສາພາກສ່ວນລວມຂອງການພົວພັນສອງປະເທດຢ່າງແຂງແຮງ ແລະສ້າງບັນຍາກາດທີ່ດີເພື່ອເປີດກວ້າງການຮ່ວມມືລະຫວ່າງສອງປະເທດນັ້ນ ແມ່ນບົດຮຽນທີ່ສຳຄັນທີ່ສຸດຂໍ້ໜຶ່ງໃນການພົວພັນຈີນ-ຟິລິບປິນໃນຊຸມປີຜ່ານມາ, ຕໍ່ເລື່ອງນີ້, ສອງຝ່າຍລ້ວນແຕ່ເຫັນດີສືບຕໍ່ຍຶດໝັ້ນແລະປົກປັກຮັກສາ. ນອກນີ້, ສອງຝ່າຍຍັງໄດ້ບັນລຸຄວາມເປັນເອກະພາບກັນທີ່ສຳຄັນກ່ຽວກັບການຊຸກຍູ້ "ໜຶ່ງແລວໜຶ່ງເສັ້ນທາງ", ການແລກປ່ຽນດ້ານວັດທະນະທຳ, ການສົນທະນາທາງທະເລ, ການຫັນພາກພື້ນເປັນໜຶ່ງດຽວ ແລະການຮ່ວມມືໃນຂົງເຂດອື່ນໆ.
 |
