ໃນກອງປະຊຸມຖະແຫຼງຂ່າວທີ່ຈັດຂຶ້ນຕາມປົກກະຕິຂອງກະຊວງການຕ່າງປະເທດຈີນ, ທ່ານນາງຮວ້າຊຸນຢິງ ໂຄສົກກະຊວງການຕ່າງປະເທດຈີນກ່າວວ່າ ຈີນຫວັງໃຫ້ຍີ່ປຸ່ນຍຶດໝັ້ນເດີນຕາມເສັ້ນທາງພັດທະນາໂດຍສັນຕິ, ໃຊ້ການກະທຳຕົວຈິງເພື່ອສ້າງຄວາມເຊື່ອໝັ້ນໃຫ້ແກ່ປະເທດໃກ້ຄຽງໃນອາຊີກໍຄືປະຊາຄົມໂລກ.
ຕາມຂ່າວແຈ້ງວ່າ: ຫວ່າງບໍ່ດົນມານີ້,ພັກຈີມິນຍີ່ປຸ່ນໄດ້ຄົ້ນຄວ້າແລະຫາລືການດັດແກ້ລັດຖະທຳມະນູນໂດຍສະເພາະຈະດັດແກ້ມາດຕາທີ 9 ແລະອາດຈະວາງແຜນການທາງຫຼັກການໃນໄລຍະໃກ້ໆນີ້.ຕໍ່ການລາຍງານຂ່າວດັ່ງກ່າວ, ທ່ານນາງຮວ້າຊຸນຢິງກ່າວວ່າວ່າ: "ເວົ້າຕາມຄວາມຈິງແລ້ວ, ເຖິງວ່າຍີ່ປຸ່ນຈະດັດແກ້ລັດຖະທຳມະນູນແນວໃດກໍຕາມມັນກໍເປັນວຽກງານພາຍໃນຂອງຍີ່ປຸ່ນ. ແຕ່ເນື່ອງຈາກສາເຫດໃນປະຫວັດສາດແລະສາເຫດທີ່ໃຜໆກໍສາມາດເຂົ້າໃຈໄດ້ນັ້ນ, ບັນຫາກ່ຽວກັບຍີ່ປຸ່ນດັດແກ້ລັດຖະທຳມະນູນສັນຕິພາບນັ້ນໄດ້ຮັບຄວາມສົນໃຈຢ່າງສູງຈາກປະຊາຄົມໂລກກໍຄືປະເທດໃກ້ຄຽງໃນອາຊີ, ບວກກັບໃນຊຸມປີຜ່ານມານີ້, ມີຄົນຈຳນວນໜຶ່ງພາຍໃນປະເທດຍີ່ປຸ່ນໄດ້ສ້າງຂໍ້ອ້າງໃນການເປີດກວ້າງການຜະລິດອາວຸດຍຸດໂທປະກອນດ້ວຍການໂຄສະນາເກີນຄວາມຈິງກ່ຽວກັບໄພຂົ່ມຂູ່ຕ່າງໆ, ຈີນຫວັງໃຫ້ຍີ່ປຸ່ນຍຶດໝັ້ນເດີນຕາມເສັ້ນທາງພັດທະນາໂດຍສັນຕິ, ໃຊ້ການກະທຳຕົວຈິງເພື່ອສ້າງຄວາມເຊື່ອໝັ້ນໃຫ້ແກ່ປະເທດໃກ້ຄຽງໃນອາຊີກໍຄືປະຊາຄົມໂລກ. ຂະນະດຽວກັນກໍເພື່ອສ້າງເງື່ອນໄຂໃຫ້ແກ່ການປັບປຸງການພົວພັນລະຫວ່າງຍີ່ປຸ່ນກັບປະເທດໃກ້ຄຽງອື່ນໆ."