ຕາມຂ່າວCRI：ວັນທີ 23 ມີນານີ້, ທ່ານຊຸຍ ທຽນ ຂາຍ, ເອກອັກຄະລັດຖະທູດຈີນປະຈຳອາເມລິກາກ່າວໃນເວລາໃຫ້ສຳພາດຕໍ່ສະຖານີໂທລະພາບບຼູມເບີກຂອງອາເມລິກາວ່າ, ໂດຍແນໃສ່ເລື່ອງທີ່ອາເມລິກາປະກາດຜົນການສຳຫຼວດມາດຕາ 301 ຕໍ່ຈີນແລະໄດ້ປະຕິບັດມາດຕະການຈຳກັດຕໍ່ຈີນ, ຈີນກຳລັງພິຈາລະນາທຸກວິທີ, ຈະນຳໃຊ້ມາດຕະການທີ່ມີຄວາມຈຳເປັນທັງໝົດເພື່ອປົກປ້ອງສິດແລະຜົນປະໂຫຍດທີ່ຊອບດ້ວຍກົດໝາຍຂອງຈີນ.
ທ່ານຊຸ່ຍ ທ່ຽນ ຂາຍກ່າວວ່າ, ຈີນບໍ່ແມ່ນແຫຼ່ງນຳເຂົ້າຜະລິດຕະພັນເຫຼັກກ້າແລະອະລູມີນຽມໃຫຍ່ທີ່ສຸດຂອງອາເມລິກາ, ຜະລິດຕະພັນເຫຼັກກ້າແລະອະລູມີນຽມຂອງຈີນທີ່ສົ່ງອອກໄປຂາຍຢູ່ອາເມລິກາພຽງແຕ່ກວມສ່ວນໜ້ອຍດ້ານໃນມູນຄ່ານຳເຂົ້າຂອງອາເມລິກາ. ຫຼາຍປະເທດມີບັນຫາທີ່ກຳລັງການຜະລິດເກີນຄວາມຕ້ອງການ, ການລົບລ້າງກຳລັງການຜະລິດທີ່ເກີນຄວາມຕ້ອງການຕ້ອງໃຫ້ທຸກຝ່າຍພະຍາຍາມຮ່ວມກັນ, ແຕ່ບໍ່ຄວນແນໃສ່ຈີນປະເທດດຽວ. ທີ່ຈິງແລ້ວ, ໃນຫຼາຍປີຜ່ານມານີ້, ຈີນໄດ້ລົບລ້າງກຳລັງການຜະລິດທີ່ເກີນຄວາມຕ້ອງການຢ່າງຫຼວງຫຼາຍ, ປະເທດອື່ນໆກໍ່ຄວນເຮັດແນວນີ້ຄືກັນ. ຈີນໄດ້ສຸມກຳລັງເຂົ້າໃນການປົກປັກຮັກສາລະບົບການຄ້າຫຼາຍຝ່າຍມາໂດຍຕະຫຼອດ, ບໍ່ຢາກເຫັນລະບົບນີ້ໄດ້ຖືກການທຳລາຍ.
ກ່ຽວກັບການຈຳກັດການລົງທຶນຂອງວິສາຫະກິດຈີນຢູ່ອາເມລິກາ, ທ່ານຊຸ່ຍ ທ່ຽນ ຂາຍກ່າວວ່າ, ການກະທຳແບບນີ້ບໍ່ມີຄວາມໝາຍໃດໆໃນດ້ານເສດຖະກິດແລະການເມືອງ, ໃນທີ່ສຸດຈະສ້າງຄວາມເສຍຫາຍແກ່ຜົນປະໂຫຍດຂອງລັດ, ນະຄອນແລະເມືອງຕ່າງໆຂອງອາເມລິກາ, ເຮັດໃຫ້ໂອກາດການປະກອບອາຊີບຂອງປະຊາຊົນໜ້ອຍລົງ, ສຸດທ້າຍຈະທຳລາຍເສດຖະກິດກວມລວມຂອງອາເມລິກາ, ເຊິ່ງບໍ່ມີຜົນດີຕໍ່ທຸກຄົນ. ທ່ານຊຸ່ຍ ທ່ຽນ ຂາຍຍັງກ່າວຕື່ມວ່າຈີນບໍ່ຢາກກໍ່ສົງຄາມການຄ້າກັບຝ່າຍໃດໆ, ແລະກຳລັງພະຍາຍາມຫຼີກເວັ້ນສົງຄາມການຄ້າ. ແຕ່ຖ້າວ່າມີຜູ້ໃດຊູຊີເຮັດ, ຈີນຈະຕອບໂຕ້ຢ່າງເດັດດ່ຽວ.
