ວັນທີ 26 ມີນານີ້, ທ່ານຈ່າງຊ້ຽງເສິນ ຜູ້ຕາງໜ້າຖາວອນຂອງຈີນປະຈຳອົງການການຄ້າໂລກ ໄດ້ກ່າວໃນກອງປະຊຸມອົງການການຄ້າໂລກວ່າ: ອາເມລິກາຖືເອົາຜົນການກວດກາ 301 ທີ່ດຳເນີນແຕ່ຝ່າຍດຽວເປັນສິ່ງອ້າງອີງ ແລະເຈຕະນາໃຊ້ມາດຕະການຈຳກັດຈີນ ໄດ້ຝືນກັບຄຳໝັ້ນສັນຍາທີ່ອາເມລິກາໃຫ້ໄວ້ກັບອົງການການຄ້າໂລກ ແລະກໍລະເມີດຄຳຕັດສິນແລະກົດລະບຽບທີ່ກ່ຽວຂ້ອງຂອງອົງການການຄ້າໂລກເຊັ່ນກັນ.
ທ່ານຈ່າງຊ້ຽງເສິນ ກ່າວເນັ້ນວ່າ: ການກະທຳຂອງອາເມລິກາເປັນການກະທຳແຕ່ຝ່າຍດຽວທີ່ຖືກຫ້າມໃນ "ຄວາມເຂົ້າໃຈການແກ້ໄຂຄວາມຂັດແຍ້ງກັນ" ຂອງອົງການການຄ້າໂລກ ທັງຝືນກັບຈິດໃຈແລະຫຼັກການພື້ນຖານທີ່ສຸດ ຂອງອົງການການຄ້າໂລກ ການກະທຳແຕ່ຝ່າຍດຽວຂອງອາເມລິກາ ບໍ່ພຽງແຕ່ໄດ້ທຳລາຍຜົນປະໂຫຍດຂອງຈີນແລະສະມາຊິກອື່ນໆເທົ່ານັ້ນ, ແຕ່ຍັງທຳລາຍໂຄງປະກອບການຄ້າຫຼາຍຝ່າຍຢ່າງໜັກໜ່ວງອີກດ້ວຍ. ທ່ານຮຽກຮ້ອງໃຫ້ສະມາຊິກອົງການການຄ້າໂລກ ຈົ່ງສຸມຈິດສຸມໃຈກັນເພື່ອສະກັດກັ້ນອາເມລິກາຟື້ນຟູການກວດກາ 301 ອີກ ແລະບໍ່ໃຫ້ປະຕິບັດຕໍ່ໄປອີກໃນຂອບກົດລະບຽບຂອງອົງການການຄ້າໂລກ.
ທ່ານຈ່າງຊ້ຽງເສິນ ກ່າວຕື່ມວ່າ: ໂດຍຜະເຊິນກັບອາເມລິກາທີ່ປະກາດຜົນສະຫຼຸບໃນການກວດກາ 301 ແລະໃຊ້ມາດຕະການຕໍ່ຈີນນັ້ນ, ຈີນກໍຈະນຳໃຊ້ກົດລະບຽບອົງການການຄ້າໂລກ ແລະວິທີອື່ນໆທີ່ຈຳເປັນ ຢ່າງເດັດດ່ຽວ ເພື່ອປົກປັກຮັກສາສິດແລະຜົນປະໂຫຍດອັນຊອບທຳຂອງຕົນເຊັ່ນດຽວກັນ.
