ໜັງສືພິມ "ເສດຖະກິດລາຍວັນ" ລາຍງານວ່າ: ແຫຼ່ງຂ່າວຈາກທະນາຄານປະຊາຊົນຈີນ ເຊິ່ງເປັນທະນາຄານກາງຈີນໃຫ້ຮູ້ວ່າ: ລະບົບຊຳລະດ້ວຍເງິນຢວນຂ້າມຊາດ ຫຼື CIPS ໄລຍະ 2 ໄດ້ເລີ່ມທົດລອງນຳໃຊ້ຢ່າງເປັນທາງການແລ້ວໃນວັນທີ 26 ມີນານີ້ ໂດຍທະນາຄານຈີນ ແລະ ທະນາຄານທຶນຕ່າງປະເທດ 10 ແຫ່ງອອນລາຍທົດລອງນຳໃຊ້ໃນຈັງຫວະດຽວກັນ ເຊິ່ງເວລາເຮັດວຽກຂອງລະບົບດັ່ງກ່າວຈະກວມເອົາເວລາເຮັດວຽກຕາມເຂດທີ່ເວລາຕ່າງກັນໃນໂລກທັງໝົດໂດຍພື້ນຖານ ເພື່ອສະໜັບສະໜູນກິດຈະການຕະຫຼາດການເງິນແລະການຊຳລະເງິນໃນບໍລິເວນທົ່ວໂລກ ແລະຕອບສະໜອງຕາມຄວາມຕ້ອງການດ້ານການຊຳລະດ້ວຍເງິນຢວນຂອງລູກຄ້າໃນໂລກ.
ຂ່າວລາຍງານຕື່ມວ່າ: ລະບົບ CIPS ແມ່ນພື້ນຖານໂຄງລ່າງດ້ານການເງິນທີ່ສຳຄັນ ທີ່ສ້າງຂຶ້ນເພື່ອສອດຄ່ອງກັບຄວາມຕ້ອງການດ້ານການພັດທະນາການຄ້າຂ້າມຊາດຂອງຈີນ ແລະເພື່ອສະໜັບສະໜູນການພັດທະນາເສດຖະກິດຕົວຈິງ ແລະ ຍຸດທະສາດການພັດທະນາທຸລະກິດຢູ່ຕ່າງປະເທດ ພ້ອມທັງຊຸກຍູ້ຂະບວນການຫັນເງິນຢວນເປັນເງິນຕາສາກົນ. ນັບແຕ່ລະບົບດັ່ງກ່າວສາມາດນຳໃຊ້ທາງອອນລາຍເປັນຕົ້ນມາ ກໍໄດ້ຮັບການປັບປຸງໃຫ້ສົມບູນຢ່າງບໍ່ຢຸດຢັ້ງ, ກິດຈະການກໍນັບມື້ນັບເພີ່ມຂຶ້ນ ແລະສາມາດສ້າງຄວາມສະດວກໃຫ້ແກ່ຜູ້ນຳໃຊ້ ທັງມີປະສິດທິພາບສູງໃນການຊຳລະເງິນ ຈຶ່ງໄດ້ຮັບການຮັບຮອງຈາກຜູ້ນຳໃຊ້ໂດຍທົ່ວໄປ.