ທ່ານ ລີ້ຈ້ານຊູ່ ປະທານຄະນະປະຈຳສະພາປະຊາຊົນແຫ່ງຊາດຈີນ ໄດ້ຕ້ອນຮັບການເຂົ້າພົບຂອງທ່ານ ສະຕີບ ໄດເນັສ ສະມາຊິກວຸດທິສະພາສະຫະລັດອາເມລິກາພ້ອມດ້ວຍຄະນະຢູ່ຫໍສະພາປະຊາຊົນໃນວັນທີ 28 ມີນານີ້.
ໂອກາດດັ່ງກ່າວ, ທ່ານ ລີ້ຈ້ານຊູ່ ກ່າວວວ່າ, ສາຍພົວພັນຈີນ-ອາເມລິກາມີຄວາມໝາຍສຳຄັນຕໍ່ສອງປະເທດກໍຄືປະຊາຄົມໂລກ. ເໝືອນດັ່ງທ່ານປະທານ ສີຈິ້ນຜິງ ເນັ້ນວ່າ, ເວົ້າສຳລັບສອງປະເທດຈີນ-ອາເມລິກາແລ້ວ, ການຮ່ວມມືແມ່ນທາງເລືອກທີ່ຖືກຕ້ອງພຽງໜຶ່ງດຽວ, ເມື່ອໄດ້ຮັບຜົນປະໂຫຍດຮ່ວມກັນແລ້ວ, ຈຶ່ງສາມາດເດີນໄປສູ່ອະນາຄົດທີ່ສວຍງາມກວ່າເກົ່າ. ຫວັງວ່າ ສອງຝ່າຍຈະຍຶດໝັ້ນປະຕິບັດຕໍ່ແລະຊຳລະແກ້ໄຂການພົວພັນຈີນ-ອາເມລິກາດ້ວຍຍຸດທະສາດສູງແລະທຸກພາກສ່ວນທັງໝົດ, ເພີ່ມທະວີການແລກປ່ຽນໃນດ້ານຍຸດທະສາດ, ສຸມໃສ່ການສົນທະນາແລະການຮ່ວມມື, ຄວບຄຸມຄວາມຂັດແຍ້ງກັນແລະບັນຫາອ່ອນໄຫວ, ຮັບປະກັນໃຫ້ການພົວພັນຈີນ-ອາເມລິກາຂະຫຍາຍໄປໜ້າຕາມເສັ້ນທາງທີ່ຖືກຕ້ອງຢ່າງສະເໝີຕົ້ນສະເໝີປາຍ.
ທ່ານ ລີ້ຈ້ານຊູ່ ກ່າວຕື່ມວ່າ, ອົງການນິຕິບັນຍັດຂອງຈີນແລະອາເມລິກາ ມີພື້ນຖານທີ່ດີໃນການຮ່ວມມື. ສະພາປະຊາຊົນແຫ່ງຊາດຈີນຍິນດີຮ່ວມກັບລັດຖະສະພາອາເມລິກາ, ເສີມຂະຫຍາຍບົດບາດຂອງກົນໄກແລກປ່ຽນຢ່າງເຕັມທີ່, ດຳເນີນການແລກປ່ຽນແລະສົນທະນາກັນຢ່າງກົງໄປກົງມາ, ເຄົາລົບຜົນປະໂຫຍດໃຈກາງແລະບັນຫາທີ່ເອົາໃຈໃສ່ຢ່າງໃຫຍ່ຫຼວງຂອງແຕ່ລະຝ່າຍ, ເພີ່ມທະວີຄວາມເຂົ້າໃຈກັນຢ່າງເລິກເຊິ່ງໃນລະດັບຕ່າງໆ, ຊຸກຍູ້ການຮ່ວມມືທີ່ແທດເໝາະກັບຕົວຈິງໃນທຸກຂົງເຂດ ເພື່ອຊ່ວຍພັດທະນາສາຍພົວພັນສອງຊາດໃຫ້ນັບມື້ນັບດີຂຶ້ນເທື່ອລະກ້າວ.