ທ່ານລູ້ຄ່າງ ໂຄສົກກະຊວງການຕ່າງປະເທດຈີນ ປະກາດໃນວັນທີ 29 ມີນານີ້ວ່າ: ໂດຍຕອບສະໜອງຕາມຄຳເຊີນຂອງລັດຖະບານຫວຽດນາມ, ທ່ານຫວາງຢີ້ ທີ່ປຶກສາແຫ່ງລັດ ທັງເປັນລັດຖະມົນຕີກະຊວງການຕ່າງປະເທດຈີນ ຈະນຳພາຄະນະຜູ້ແທນເຂົ້າຮ່ວມກອງປະຊຸມຜູ້ນຳການຮ່ວມມືເສດຖະກິດອະນຸພາກພື້ນແມ່ນ້ຳຂອງ ຫຼື GMS ຄັ້ງທີ 6 ທັງຢ້ຽມຢາມຫວຽດນາມຢ່າງເປັນທາງການ ແຕ່ວັນທີ 30 ມີນາ-ວັນທີ 2 ເມສາໜ້ານີ້.
ໂອກາດນີ້, ທ່ານຫວາງຢີ້ ຈະເຂົ້າຮ່ວມກອງປະຊຸມພາຍໃນ, ກອງປະຊຸມວົງກວ້າງ, ກອງປະຊຸມສຸດຍອດອຸດສາຫະກຳການຄ້າ, ເຂົ້າຮ່ວມການພົບປະສອງຝ່າຍກັບຜູ້ນຳປະເທດອື່ນໆທີ່ເຂົ້າຮ່ວມກອງປະຊຸມດັ່ງກ່າວ ແລະກິດຈະກຳສຳຄັນອື່ນໆ.
ທ່ານລູ້ຄ່າງ ກ່າວວ່າ: ການເດີນທາງຢ້ຽມຢາມຫວຽດນາມຂອງທ່ານຫວາງຢີ້ ເທື່ອນີ້ ເປັນຄັ້ງທຳອິດທີ່ຜູ້ນຳຈີນຢ້ຽມຢາມຫວຽດນາມ ຫຼັງລັດຖະບານຊຸດໃໝ່ຂອງຈີນສ້າງຕັ້ງຂຶ້ນ ເຊິ່ງສະແດງໃຫ້ເຫັນວ່າ ຈີນໃຫ້ຄວາມສຳຄັນຕໍ່ການພັດທະນາສາຍພົວພັນລະຫວ່າງສອງປະເທດ ແລະ ສາຍພົວພັນລະຫວ່າງສອງປະເທດກໍພັດທະນາດີຂຶ້ນຢ່າງຕໍ່ເນື່ອງ.
