ທ່ານພັນເອກພິເສດ ເຣີ໊ນໂກວ໋ສຽງ ໂຄສົກກະຊວງປ້ອງກັນປະເທດຈີນ ເປີດເຜີຍຢູ່ນະຄອນຫຼວງປັກກິ່ງໃນວັນທີ 29 ມີນານີ້ວ່າ: ໂດຍຕອບສະໜອງຕາມຄຳເຊີນຂອງທ່ານພົນເອກພິເສດ ເຊີເກ ຄູຊູເກໂຕວິກ ໂຊອີກູ ລັດຖະມົນຕີກະຊວງປ້ອງກັນປະເທດຣັດເຊຍ ແລະ ທ່ານພົນໂທອັນເດຣ ລັຟຄົຟ ລັດຖະມົນຕີກະຊວງປ້ອງກັນປະເທດເບລາຣູຊີ, ທ່ານພົນເອກເວິ້ຍເຟິ້ງເຫີ ທີ່ປຶກສາແຫ່ງລັດ ທັງເປັນລັດຖະມົນຕີກະຊວງປ້ອງກັນປະເທດຈີນ ຈະເດີນທາງໄປເຂົ້າຮ່ວມກອງປະຊຸມຄວາມໝັ້ນຄົງສາກົນມົສກູຄັ້ງທີ 7 ທັງຈະຢ້ຽມຢາມຣັດເຊຍ ແລະ ເບລາຣູຊີ ແຕ່ວັນທີ 1-8 ເມສາໜ້ານີ້.
ທ່ານເວິ້ຍເຟິ້ງເຫີ ທີ່ຫາກໍຂຶ້ນຮັບຕຳແໜ່ງໃໝ່ດັ່ງກ່າວ ກໍຖືເອົາຣັດເຊຍເປັນເປົ້າໝາຍເດີນທາງຢ້ຽມຢາມປະເທດທຳອິດໃນຄັ້ງນີ້ ທ່ານເຣີ໊ນໂກວ໋ສຽງ ກ່າວວ່າ: ການເດີນທາງຢ້ຽມຢາມຣັດເຊຍ ຂອງທ່ານເວິ້ຍເຟິ້ງເຫີ ເທື່ອນີ້ ກໍເພື່ອຈັດຕັ້ງປະຕິບັດຕາມຄວາມຮັບຮູ້ທີ່ເປັນເອກະພາບອັນສຳຄັນ ທີ່ທ່ານປະທານສີຈິ້ນຜິງ ແລະ ທ່ານວະລາດີເມຍ ປູຕິນ ປະທານາທິບໍດີຣັດເຊຍ ໄດ້ຕົກລົງກັນ ເຊິ່ງຈະມີຜົນດີຕໍ່ການລົງເລິກການຮ່ວມມືທີ່ແທ້ຈິງລະຫວ່າງສອງກອງທັບຢ່າງຮອບດ້ານ ແລະເສີມສ້າງສາຍພົວພັນຄູ່ປະສານງານທາງຍຸດທະສາດຮອບດ້ານລະຫວ່າງສອງປະເທດໃຫ້ຂະຫຍາຍຕົວຕື່ມອີກ. ຈີນຍິນດີພະຍາຍາມຮ່ວມກັບຣັດເຊຍ ຊຸກຍູ້ການພົວພັນລະຫວ່າງສອງກອງທັບໃຫ້ພັດທະນາຕື່ມອີກ, ຮ່ວມກັນປົກປັກຮັກສາຜົນປະໂຫຍດຂອງສອງຝ່າຍ ແລະຮ່ວມກັນປົກປັກຮັກສາສັນຕິພາບ ແລະສະຖຽນລະພາບຂອງພາກພື້ນ ກໍຄືຂອງໂລກ.
