ຄະນະກຳມະການສົ່ງເສີມການຄ້າສາກົນຈີນ ໄດ້ຈັດກອງປະຊຸມຖະແຫຼງຂ່າວໃນວັນທີ 29 ມີນານີ້ ເພື່ອປະກາດວ່າ, ເວທີປຶກສາຫາລືການຄ້າການລົງທຶນ "ໜຶ່ງແລວໜຶ່ງເສັ້ນທາງ" ຈະຈັດຂຶ້ນຢູ່ນະຄອນຫຼວງປັກກິ່ງໃນວັນທີ 12 ເມສາປີນີ້. ທ່ານ ຢວີ໊ຈ້ຽນລົງ ເລຂາທິການໃຫຍ່ສະມາຄົມການຄ້າສາກົນຈີນໃຫ້ຮູ້ວ່າ, ເວທີປຶກສາຫາລືຄັ້ງນີ້ ໄດ້ດຶງດູດຜູ້ຕາງໜ້າ 600 ກວ່າທ່ານຈາກຈີນແລະອີກ 70 ກວ່າປະເທດແລະເຂດແຄວ້ນມາເຂົ້າຮ່ວມ.
ເວທີປຶກສາຫາລືຄັ້ງນີ້ ຈັດຂຶ້ນໂດຍຄະນະກຳມະການສົ່ງເສີມການຄ້າສາກົນຈີນ, ສະມາຄົມການຄ້າສາກົນຈີນ ແລະສະຫະສະມາຄົມການຄ້າໂລກ ແລະເນັ້ນຫົວຂໍ້ວ່າ "ປ່ອຍຄວາມສາມາດບົ່ມຊ້ອນ, ຮ່ວມກັນຊົມໃຊ້ອະນາຄົດ".
ສະຖິຕິສະແດງໃຫ້ເຫັນວ່າ, ນັບແຕ່ເດືອນມັງກອນຫາເດືອນກຸມພາປີນີ້, ຈີນໄດ້ເພີ່ມການສົ່ງອອກແລະການນຳເຂົ້າຈາກຕະຫຼາດຈະເລີນໃໝ່ທີ່ເປັນປະເທດລຽບຕາມ "ໜຶ່ງແລວໜຶ່ງເສັ້ນທາງ" ຢ່າງວ່ອງໄວ, ລວມເຂົ້າກັນແລ້ວ, ຕົກເປັນມູນຄ່າ 1260 ຕື້ຢວນ, ເພີ່ມຂຶ້ນ 21,9% ເຊິ່ງສູງກວ່າຄວາມໄວເພີ່ມຂຶ້ນດ້ານການຄ້າສົ່ງອອກແລະນຳເຂົ້າໂດຍລວມຂອງຈີນ 5,2%. ເສດຖະກິດການຄ້າລຽບຕາມ "ໜຶ່ງແລວໜຶ່ງເສັ້ນທາງ" ໄດ້ມີທ່ວງທ່າພັດທະນາຢ່າງຄຶກຄັກຫຼາຍຂຶ້ນກວ່າເກົ່າ.
 |
