ແນໃສ່ກໍລະນີທ່ານ ເຕຣີ ບຣານສະເຕັດ ເອກອັກຄະລັດຖະທູດອາເມລິກາປະຈຳຈີນໃຫ້ສຳພາດຕໍ່ນັກຂ່າວວ່າ ຈີນບໍ່ຄວນໃຊ້ມາດຕະການຈຳກັດການນຳເຂົ້າໝາກຖົ່ວເຫຼືອງຈາກອາເມລິກາເປັນການແກ້ແຄ້ນຕໍ່ອາເມລິກາ, ທ່ານລູ້ຄ່າງ ໂຄສົກກະຊວງການຕ່າງປະເທດຈີນກ່າວໃນກອງປະຊຸມຖະແຫຼງຂ່າວໃນວັນທີ 30 ມີນານີ້ວ່າ: ທ່ານເອກອັກຄະລັດຖະທູດບຣານສະເຕັດມາຈາກລັດສຳຄັນໃນການພັດທະນາກະສິກຳຂອງອາເມລິກາ, ທ່ານເອົາໃຈໃສ່ຜົນປະໂຫຍດຂອງຜູ້ປະກອບການຂະແໜງການກະສິກຳອາເມລິການັ້ນເປັນເລື່ອງສົມເຫດສົມຜົນທີ່ຄວນໃຫ້ຄວາມເຂົ້າໃຈ. ຄວາມຈິງແລ້ວ, ພາຍໃນປະເທດອາເມລິກາເປັນຫ່ວງວ່າມາດຕະການລັດທິຝ່າຍດຽວຂອງລັດຖະບານອາເມລິກາຈະເຮັດໃຫ້ການພົວພັນການຄ້າອາເມລິກາ-ຈີນຊຸດໂຊມລົງນັ້ນບໍ່ຈຳກັດແຕ່ຂະແໜງການຜະລິດຕະພັນກະສິກຳເທົ່ານັ້ນ.
ທ່ານລູ້ຄ່າງກ່າວວ່າ: ຈີນຄວນຖືໝາກຖົ່ວເຫຼືອງເປັນຂົງເຂດໃຊ້ມາດຕະການຕອບໂຕ້ຫຼືບໍ່, ສິ່ງທີ່ຄວນຮັບຮູ້ຢ່າງຈະແຈ້ງນັ້ນຄືຄວາມແຕກຕ່າງລະຫວ່າງການຄ້າກັບສົງຄາມການຄ້າຄື ການຄ້າ ແມ່ນດຳເນີນໂດຍຝ່າຍຕ່າງໆປຶກສາຫາລືກັນ, ແຕ່ສົງຄາມການຄ້າຫາກກໍ່ຂຶ້ນແລ້ວ, ຝ່າຍຕອບໂຕ້ພຽງແຕ່ຈະອີງຕາມຜົນປະໂຫຍດແລະຄວາມຕ້ອງການຂອງຕົນເພື່ອຕັດສິນເວລາ,ວິທີແລະຂົງເຂດໃນການໃຊ້ມາດຕະການຕອບໂຕ້. ຈີນໄດ້ກ່າວມາຫຼາຍເທື່ອແລ້ວວ່າ: ຈີນບໍ່ຢາກເຂົ້າຮ່ວມສົງຄາມການຄ້າ. ຂະນະດຽວກັນ, ຈີນກໍໄດ້ກ່າວຢ່າງຈະແຈ້ງຫຼາຍເທື່ອແລ້ວວ່າ ຖ້າຫາກຖືກບັງຄັບເຂົ້າຮ່ວມສົງຄາມການຄ້າ, ຈີນມີຄວາມໝັ້ນໃຈປົກປັກຮັກສາຜົນປະໂຫຍດຂອງຕົນເປັນຢ່າງດີ. ຈີນຫວັງວ່າ ຜູ້ຕັດສິນນະໂຍບາຍຂອງອາເມລິກາຈະຕັ້ງໃຈຮັບຟັງສຽງຮຽກຮ້ອງຢ່າງກວ້າງຂວາງຈາກຜູ້ບໍລິໂພກແລະຂະແໜງການພາຍໃນປະເທດອາເມລິກາ, ຕັ້ງໃຈຊັ່ງຊາຜົນໄດ້ຜົນເສຍຂອງມາດຕະການລັດທິຝ່າຍດຽວຕໍ່ອາເມລິກາ, ບໍ່ຈຳເປັນພົບຜົນເສຍຫາຍແລ້ວຈິ່ງຖອຍຫຼັງ.