ລັດຖະມົນຕີການຕ່າງປະເທດຈີນເຂົ້າຮ່ວມກອງປະຊຸມສຸດຍອດຄັ້ງທີ 6 ຂອງGMS

ວັນທີ 31 ມີນາຜ່ານມານີ້, ທ່ານຫວາງຢີ້, ທີ່ປຶກສາແຫ່ງລັດ ທັງເປັນລັດຖະມົນຕີກະຊວງການຕ່າງປະເທດຈີນໄດ້ເຂົ້າຮ່ວມກອງປະຊຸມສຸດຍອດຄັ້ງທີ 6 ຂອງຂອບການຮ່ວມມືເສດຖະກິດອະນຸພາກພື້ນລຸ່ມແມ່ນ້ຳຂອງ ຫຼື GMS ຢູ່ນະຄອນຫຼວງຮ່າໂນ້ຍປະເທດຫວຽດນາມ.

ທ່ານຫວ່າງຢີ້ໄດ້ປະກອບຄຳເຫັນໂດຍກ່າວວ່າ, ການຮ່ວມມືເສດຖະກິດພາກພື້ນລຸ່ມແມ່ນ້ຳຂອງໄດ້ດຳເນີນມາເປັນເວລາ 25 ປີແລ້ວ ເຊິ່ງເຮັດໃຫ້ອະນຸພາກພື້ນນີ້ກາຍເປັນອະນຸພາກພື້ນທີ່ມີພະລັງຊຸກຍູ້ການເຕີບໂຕທີ່ແຂງແຮງທີ່ສຸດ ແລະມີທ່າອຽງພັດທະນາທີ່ດີທີ່ສຸດຢູ່ອາຊີ. ພວກເຮົາຄວນສະຫຼຸບບົດຮຽນ, ກຳແໜ້ນກາລະໂອກາດ, ເປີດສະພາບການໃໝ່ແຫ່ງການຮ່ວມມືອະນຸພາກພື້ນ. ຕ້ອງຊຸກຍູ້ເສດຖະກິດໃຫ້ເຕີບໂຕຢ່າງແຂງແຮງກວ່າເກົ່າ, ເປີດຊ່ອງທາງໃໝ່ໃນການຂຸດຄົ້ນກຳລັງຊຸກຍູ້ການເຕີບໂຕ, ເພີ່ມທະວີກຳລັງຊຸກຍູ້ດ້ວຍການປະດິດສ້າງໃໝ່ ແລະ ຍົກສູງປະສິດທິຜົນດ້ວຍການປ່ຽນແປງໃໝ່. ຕ້ອງສ້າງໂຄງຮ່າງການຮ່ວມມືທີ່ເປີດປະຕູກວ່າເກົ່າ, ຊຸກຍູ້ການຄ້າ ແລະ ການລົງທຶນມີເສລີພາບ ແລະ ມີຄວາມສະດວກກວ່າເກົ່າຢ່າງບໍ່ຢຸດຢັ້ງ, ສະໜັບສະໜູນຂອບການຄ້າຫຼາຍຝ່າຍ, ຊຸກຍູ້ໃຫ້ເສດຖະກິດໂລກາພິວັດພັດທະນາໄປສູ່ທິດທາງທີ່ເປີດປະຕູ, ກວມລວມ, ສ້າງຜົນປະໂຫຍດໃຫ້ທົ່ວເຖິງ, ດຸນດ່ຽງກັນ ແລະ ຕ່າງຝ່າຍຕ່າງມີຜົນປະໂຫຍດ. ຕ້ອງສ້າງເຄືອຂ່າຍເຊື່ອມຈອດກັນທີ່ປະສານສົມທົບຢ່າງໃກ້ຊິດກວ່າເກົ່າ, ເນັ້ນຊຸກຍູ້ການກໍ່ສ້າງໂຄງການສຳຄັນ, ເສີມຂະຫຍາຍກຳລັງບົ່ມຊ້ອນຂອງການເຊື່ອມຈອດກັນໃນການພັດທະນາເສດຖະກິດ ແລະ ປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ. ຕ້ອງເສີມສ້າງສາຍພົວພັນຄູ່ຮ່ວມມືໃຫ້ໃກ້ຊິດກວ່າເກົ່າ,ຍຶດໝັ້ນຫຼັກການທີ່ເຄົາລົບກັນ, ປະຕິບັດຕໍ່ກັນຢ່າງສະເໝີພາບກັນ, ໂອບອ້ອມອາລີ ແລະ ໄວ້ເນື້ອເຊື່ອໃຈກັນ, ສະແຫວງຫາຕ່າງຝ່າຍຕ່າງມີຜົນປະໂຫຍດໃນການຮ່ວມມືກັນ, ເດີນຕາມເສັ້ນທາງທີ່ພັດທະນາ ແລະ ຈະເລີນຮຸ່ງເຮືອງພ້ອມກັນ.

ທ່ານຫວາງຢີ້ກ່າວວ່າ, ໂດຍອີງຕາມແຜນການທີ່ກຳນົດໄວ້ໃນກອງປະຊຸມໃຫຍ່ຄັ້ງທີ 19 ຂອງພັກກອມມູນິດຈີນ, ປະເທດຈີນໃນຍຸກໃໝ່ຈະສຸມໃສ່ການສະແຫວງຫາການພັດທະນາດ້ວຍຄຸນນະພາບສູງ, ລົງເລິກການປະຕິຮູບ ແລະເປີດປະຕູສູ່ພາຍນອກຕື່ມອີກ, ລົງເລິກການຮ່ວມມືແບບຕ່າງຝ່າຍຕ່າງມີຜົນປະໂຫຍດກັບປະເທດອ້ອມຂ້າງ. ປະເທດໃນອະນຸພາກພື້ນເປັນຄູ່ຮ່ວມມືທຳມະຊາດໃນການສ້າງ "ໜຶ່ງແນວໜຶ່ງເສັ້ນທາງ", ກໍເປັນເປົ້າໝາຍທີ່ໄດ້ຮັບຜົນປະໂຫຍດກ່ອນໝູ່. ພວກເຮົາຈະຊຸກຍູ້ການຮ່ວມມືໃນອະນຸພາກພື້ນໃຫ້ເຊື່ອມຈອດກັບຂໍ້ລິເລີ່ມ "ໜຶ່ງແລວໜຶ່ງເສັ້ນທາງ", ບັນລຸການພັດທະນາແບບປະສານສົມທົບກັນ. ພວກເຮົາຕ້ອງມີການເຊື່ອມຈອດດ້ານນະໂຍບາຍຢ່າງແທ້ຈິງ, ພັດທະນາແລວທາງເສດຖະກິດໃຫ້ດີ, ຮັດແໜ້ນສາຍພົວພັນດ້ານເສດຖະກິດການຄ້າ, ລົງເລິກຄວາມເຂົ້າໃຈກັນດ້ານຈິດໃຈຂອງປະຊາຊົນ, ສ້າງປະຊາຄົມຮ່ວມຊາຕາກຳທີ່ແໜ້ນແຟ້ນກວ່າເກົ່າໃນອະນຸພາກພື້ນ, ສ້າງອະນາຄົດທີ່ສົດໃສກວ່າເກົ່າສຳລັບການພັດທະນາຂອງອະນຸພາກພື້ນ.