ຫ້ອງການຖະແຫຼງຂ່າວລັດຖະບານຈີນໄດ້ເຜີຍແຜ່ປື້ມປົກຂາວ "ນະໂຍບາຍແລະພຶດຕິກຳຂອງຈີນໃນການຮັບປະກັນເສລີພາບການເຊື່ອຖືສາສະໜາ" ໃນວັນທີ 3 ເມສານີ້.
ປື້ມປົກຂາວດັ່ງກ່າວໄດ້ແບ່ງອອກເປັນ 5 ພາກສ່ວນ ຄື ນະໂຍບາຍພື້ນຖານການຮັບປະກັນເສລີພາບການເຊື່ອຖືສາສະໜາ, ການຮັບປະກັນທາງກົດໝາຍຕໍ່ສິດເສລີພາບໃນການເຊື່ອຖືສາສະໜາ, ການດຳເນີນກິດຈະກຳສາສະໜາຢ່າງເປັນລະບຽບຮຽບຮ້ອຍ, ວົງການສາສະໜາໄດ້ເສີມຂະຫຍາຍບົດບາດຢ່າງເຕັມສ່ວນ ແລະ ການພົວພັນທີ່ຕັ້ງໜ້າແລະປອດໃສລະຫວ່າງສາສະໜາຕ່າງໆ.
ປື້ມປົກຂາວຊີ້ວ່າ: ແຕ່ໃດມາ, ຈີນກໍຍຶດໝັ້ນຖືເອົາສະພາບການ ແລະຄວາມເປັນຈິງຂອງສາສະໜາປະເທດຕົນເປັນເດີມພັນ, ປະຕິບັດນະໂຍບາຍຮັບປະກັນເສລີພາບການເຊື່ອຖືສາສະໜາ, ຮັບປະກັນສິດເສລີພາບການເຊື່ອຖືສາສະໜາຂອງພົນລະເມືອງປະເທດຕົນ, ສ້າງການພົວພັນທີ່ຕັ້ງໜ້າແລະປອດໃສລະຫວ່າງສາສະໜາຕ່າງໆ, ຮັກສາຄວາມປອງດອງລະຫວ່າງສາສະໜາ ແລະ ຄວາມປອງດອງທາງສັງຄົມ.
ປື້ມປົກຂາວ ຍັງຊີ້ວ່າ: ໂດຍປະສານສົມທົບກັນລະຫວ່າງການພັດທະນາແລະປ່ຽນແປງຂອງສາສະໜາ ກັບຄວາມຈິງຂອງວຽກງານສາສະໜາ, ຈີນໄດ້ເປີດເສັ້ນທາງສຳເລັດຜົນເສັ້ນໜຶ່ງທີ່ຮັບປະກັນເສລີພາບການເຊື່ອຖືສາສະໜາຕາມກົດໝາຍ, ຊຸກຍູ້ໃຫ້ການພົວພັນລະຫວ່າງສາສະໜາຕ່າງໆມີຄວາມປອງດອງກັນ ແລະ ໃຫ້ວົງການສາສະໜາເສີມຂະຫຍາຍບົດບາດອັນຕັ້ງໜ້າ. ບົດລາຍງານຂອງກອງປະຊຸມຜູ້ແທນທົ່ວປະເທດຂອງພັກກອມມູນິດຈີນຄັ້ງທີ 19 ໄດ້ຊີ້ໃຫ້ເຫັນຢ່າງຈະແຈ້ງວ່າ: ຕ້ອງຜັນຂະຫຍາຍທິດທາງພື້ນຖານຂອງພັກໃນວຽກງານສາສະໜາຢ່າງຮອບດ້ານ, ຍຶດໝັ້ນທິດທາງຫັນສາສະໜາໃຫ້ມີຈຸດພິເສດຂອງຈີນ, ຕັ້ງໜ້າຊີ້ນຳໃຫ້ສາສະໜາແລະສັງຄົມສັງຄົມນິຍົມສອດຄ່ອງກັນ. ຈີນຈະເຮັດຄືດັ່ງທີ່ເຄີຍໄດ້ປະຕິບັດຜ່ານມາ ໂດຍເຄົາລົບ ແລະ ຮັບປະກັນໃຫ້ພົນລະເມືອງມີເສລີພາບໃນການເຊື່ອຖືສາສະໜາ, ພະຍາຍາມສ້າງສາປະເທດຊາດໃຫ້ເປັນປະເທດສັງຄົມນິຍົມທີ່ເຂັ້ມແຂງທັນສະໄໝ, ຮັ່ງມີ, ປະຊາທິປະໄຕ, ອາລະຍະທຳ, ປອງດອງກັນ ແລະ ສວຍງາມ.
