ວັນທີ 2 ເມສານີ້, ທ່ານສີຈິ້ນຜິງ ປະທານປະເທດຈີນໄດ້ສົ່ງໂທລະເລກຊົມເຊີຍທ່ານອັບເດວ ຟາຕາ ໄຊສີ ທີ່ໄດ້ຮັບເລືອກຕັ້ງເປັນປະທານາທິບໍດີເອຢິບອີກວາລະໜຶ່ງ.
ໃນໂທລະເລກຊົມເຊີຍຂອງທ່ານສີຈິ້ນຜິງລະບຸວ່າ: ໄມຕີຈິດມິດຕະພາບຈີນ-ເອຢິບມີມາແຕ່ບູຮານນະການ ແລະນັບມື້ນັບແໜ້ນແຟ້ນຍິ່ງໆຂຶ້ນ. ໃນຊຸມປີຜ່ານມາ, ຂ້າພະເຈົ້າໄດ້ຮັກສາການໄປມາຫາສູ່ກັນກັບທ່ານຢ່າງໃກ້ຊິດ ຄວາມໄວ້ເນື້ອເຊື້ອໃຈເຊິ່ງກັນ ແລະກັນທາງການເມືອງລະຫວ່າງສອງປະເທດກໍລົງສູ່ລວງເລິກຢ່າງບໍ່ຢຸດຢັ້ງ, ການຮ່ວມມືທີ່ແທດເໝາະກັບຕົວຈິງໄດ້ຊຸກຍູ້ຂະຫຍາຍໄປໜ້າຢ່າງຕໍ່ເນື່ອງ, ການແລກປ່ຽນທາງດ້ານວັດທະນະທຳຄຶກຄັກກວ່າເກົ່າ ແລະຈິດໃຈປະຊາຊົນສອງຊາດໄດ້ຮັບການປະສານຍິ່ງໆຂຶ້ນ, ຂ້າພະເຈົ້າຮູ້ສຶກດີໃຈຫຼາຍຕໍ່ສະພາບການດັ່ງກ່າວ ແລະຫວັງວ່າ: ພາຍໃຕ້ການນຳພາຂອງທ່ານໄຊສີ, ປະຊາຊົນເອຢິບຈະສາມາດຮັບໝາກຜົນທີ່ສຳຄັນຫຼາຍກວ່າເກົ່າໃນການຄົ້ນຫາເສັ້ນທາງການພັດທະນາທີ່ສອດຄ່ອງກັບສະພາບຕົວຈິງຂອງປະເທດຕົນ. ຂ້າພະເຈົ້າເອົາໃຈໃສ່ເປັນຢ່າງສູງຕໍ່ການພັດທະນາສາຍພົວພັນຈີນ-ເອຢິບ ແລະຈະສືບຕໍ່ພະຍາຍາມຮ່ວມກັບທ່ານ ເພື່ອພະຍາຍາມຊຸກຍູ້ສາຍພົວພັນຄູ່ຮ່ວມຍຸດທະສາດຮອບດ້ານຈີນ-ເອຢິບໃຫ້ກ້າວຂຶ້ນສູ່ລະດັບໃໝ່ຢ່າງບໍ່ຢຸດຢັ້ງ ແລະສ້າງຄວາມສຸກໃຫ້ສອງປະເທດ ກໍ່ຄືປະຊາຊົນສອງຊາດ.