ວັນທີ 2 ເມສານີ້, ໂຄສົກກອງປະຊຸມຂ່າວຂອງກອງປະຊຸມເວທີປຶກສາຫາລືອາຊີໂປອາວປີ 2018 ເປີດເຜີຍວ່າ, ປີນີ້ຈະສືບຕໍ່ຈັດກອງປະຊຸມໂຕະມົນນັກທຸລະກິດຈີນຕ່າງດ້າວດີເດັ່ນກັບອົງການຫົວກະທິຈີນຕ່າງດ້າວ ເຊິ່ງມີຫົວຂໍ້ວ່າ: ຊາວຈີນຕ່າງດ້າວທີ່ເປີດປະຕູ ແລະ ມີຫົວຄິດປະດິດສ້າງ ໂດຍຈະມີ 4 ຫົວຂໍ້ນ້ອຍ ຄື ການປະກອບສ່ວນ ແລະ ບົດບາດຂອງຊາວຈີນຕ່າງດ້າວໃນການເປີດປະຕູສູ່ພາຍນອກຂອງຈີນ, ການສ້າງ ແລະ ພັດທະນາເຄືອຂ່າຍປະສານສົມທົບທາງເສດຖະກິດຂອງນັກທຸລະກິດຊາວຈີນຕ່າງດ້າວທົ່ວໂລກ, ບົດບາດຂອງຊາວຈີນຕ່າງດ້າວໃນການສ້າງ "ໜຶ່ງແລວໜຶ່ງເສັ້ນທາງ" ແລະ ການຍົກລະດັບທຸລະກິດ ແລະ ການພັດທະນາແບບມີການປະດິດສ້າງໃໝ່ຂອງນັກທຸລະກິດຊາວຈີນຕ່າງດ້າວ. ປັດຈຸບັນ, ມີ ນັກທຸລະກິດຊາວຈີນຕ່າງດ້າວດີເດັ່ນ 27 ທ່ານໄດ້ຢືນຢັນວ່າຈະມາຮ່ວມກອງປະຊຸມຄັ້ງນີ້.
ກອງປະຊຸມອາຊີໂປອາວປີ 2018 ຈະຈັດຂຶ້ນລະຫວ່າງວັນທີ 8 ຫາ 11 ເມສານີ້ ເຊິ່ງ ມີຫົວຂໍ້ວ່າ: "ອາຊີທີ່ເປີດປະຕູ ແລະ ມີການປະດິດສ້າງໃໝ່ ກັບ ໂລກທີ່ຈະເລີນຮຸ່ງເຮືອງ ແລະ ພັດທະນາ" ແລະ ຈະມີກອງປະຊຸມປຶກສາຫາລືຢ່າງເປັນທາງການ 65 ຄັ້ງ.
 |
