ຕອນຮຸ່ງເຊົ້າວັນທີ 4 ເມສານີ້ ຕາມເວລາປັກກິ່ງ, ຫ້ອງວ່າການຜູ້ຕາງໜ້າການຄ້າອາເມລິກາໄດ້ເປີດເຜີຍບັນຊີລາຍຊື່ສິນຄ້າສະບັບໜຶ່ງຢູ່ເທິງເວັບໄຊຕົນ ເຊິ່ງລະບຸວ່າ: ໃນຕໍ່ໜ້າ, ຜະລິດຕະພັນທີ່ນຳເຂົ້າຈາກຈີນປະມານ 1300 ລາຍການອາດຈະຕ້ອງເສຍພາສີເຖິງ 25%, ຍອດມູນຄ່າອາດຈະເພີ່ມຂຶ້ນເຖິງ 50 ຕື້ໂດລາສະຫະລັດ.
ຕາມຜູ້ຕາງໜ້າການຄ້າອາເມລິກາເປີດເຜີຍວ່າ: ບັນຊີສະບັບນີ້ແມ່ນສ້າງຂຶ້ນດ້ວຍການຄຳນວນຈາກລະບົບຄອມພິວເຕີ ເຊິ່ງສາມາດເພີ່ມຄວາມລຳບາກໃຈໃຫ້ແກ່ນັກທຸລະກິດຈີນຢ່າງຫຼວງຫຼາຍ ເພື່ອປົກປັກຮັກສາຜົນປະໂຫຍດຂອງຜູ້ຜະລິດຂອງອາເມລິກາໃຫ້ດີກວ່າເກົ່າ. ແຕ່ວ່າ ເມື່ອເບິ່ງຈາກລາຍລະອຽດຂອງບັນຊີສະບັບນີ້ແລ້ວ, ນອກຈາກເຮັດໃຫ້ຄົນຮູ້ສຶກວ່າອາເມລິກາກຳລັງເຮັດສິ່ງທີ່ເສຍແຮງລ້າໆທັງບໍ່ມີຜົນດີຕໍ່ຕົນກໍຄືຜູ້ອື່ນ, ຍັງເຮັດໃຫ້ຄົນຮູ້ສຶກງົງອີກດ້ວຍ.
ສິນຄ້າຫຼາຍປະເພດທີ່ຈັດຢູ່ໃນອັນດັບຕົ້ນໃນບັນຊີດັ່ງກ່າວ ເຊັ່ນໂລຫະໂທຣຽມປະສົມ, ໂລຫະປະສົມດີເພັລດທິດ ຢູເຮນຽມ, ເຄື່ອງປັ້ນດິນເຜົາທົນຄວາມຮ້ອນສູງ, ສານກຳພັນຕະພາບລັງສີທີ່ນອກຈາກDeuterium oxide ແລະອື່ນໆ ທັງນີ້ເປັນສິນຄ້າທີ່ຈີນບໍ່ຄວນຂາຍໃຫ້ອາເມລິກາ. ເຖິງຈະບໍ່ເວົ້າຜົນປະໂຫຍດ ຂອງສິນຄ້າເຫຼົ່ານີ້ກໍຕາມ, ພຽງພິຈາລະນາເຖິງບັນຫາມົນລະພິດທີ່ອາດຈະເກີດຂຶ້ນໃນຂັ້ນຕອນການຜະລິດເທົ່ານັ້ນ, ມັນກໍເປັນສິນຄ້າທີ່ຄວນຈຳກັດການສົ່ງອອກຢ່າງເຂັ້ມງວດຢູ່ແລ້ວ, ໄປຄຽງຄູ່ກັບການພັດທະນາຂອງຈີນ, ໃນຕໍ່ໜ້າ, ພາຍໃນປະເທດຈີນກໍຕ້ອງການສິນຄ້າເຫຼົ່ານີ້ເພີ່ມຂຶ້ນຕື່ມອີກເຊັ່ນກັນ. ຈາກນີ້ເຫັນໄດ້ວ່າ, ອາເມລິກາຂວ້ຳບາດຜະລິດຕະພັນດັ່ງກ່າວຂອງຈີນ, ນອກຈາກເຮັດໃຫ້ຄົນງົງແລ້ວ, ມັນກໍບໍ່ເປັນເລື່ອງບໍ່ດີຕໍ່ຈີນອີກດ້ວຍ.
ໃນດ້ານຜະລິດຕະພັນເຫຼັກກ້າ ແລະອາລູມີນຽມ, ຈີນບໍ່ໄດ້ເປັນຜູ້ສົ່ງອອກຕໍ່ອາເມລິກາຢ່າງຫຼວງຫຼາຍ. ຖ້າວ່າລັດຖະບານໂດນັນ ທຣຳພິຈາລະນາເຖິງພື້ນຖານການເມືອງຂອງຕົນ ແລະຫວັງຢາກປົກປ້ອງຂະແໜງການຫຼອມໂລຫະປະເທດຕົນແລ້ວ, ພຽງແຕ່ຈຳກັດຕໍ່ຈີນປະເທດດຽວ ຍັງບໍ່ພຽງພໍ ເມື່ອເບິ່ງຈາກສະຖານະການໃນປັດຈຸບັນແລ້ວເຫັນວ່າ, ການຈຳກັດຕໍ່ຈີນພຽງປະເທດດຽວ ຈະບໍ່ໄດ້ຮັບຜົນທີ່ຫວັງຢາກປົກປ້ອງຂະແໜງການຫຼອມໂລຫະຂອງອາເມລິກາແຕ່ຢ່າງໃດ.
ນອກນີ້, ຜະລິດຕະພັນກົນຈັກ ແລະເຄື່ອງຜະລິດໄຟຟ້າ ຊະນິດຕ່າງໆກໍຖືກຈັດເຂົ້າໃນບັນຊີລາຍການຂຶ້ນອັດຕາພາສີ ແຕ່ໃນຜະລິດຕະພັນເຫຼົ່ານີ້ ສ່ວນຫຼາຍແມ່ນເຄື່ອງໃຊ້ປະຈຳວັນທີ່ຊາວອາເມລິກາຈະຂາດບໍ່ໄດ້ ແຕ່ບໍລິສັດທີ່ຜະລິດຜະລິດຕະພັນດັ່ງກ່າວພາຍໃນປະເທດອາເມລິກາມີບໍ່ຫຼາຍແລ້ວ ຈຶ່ງເຮັດໃຫ້ລາຄາສິນຄ້າເຫຼົ່ານີ້ແພງຫຼາຍ. ສະນັ້ນ, ຜົນຈາກການສຽດສີທາງການຄ້າ ຍ່ອມຈະເຮັດໃຫ້ຊາວອາເມລິກາ ໂດຍສະເພາະຄົນຊັ້ນກາງແລະລຸ່ມໃນສັງຄົມຈະຕ້ອງເສຍຄ່າອຸປະໂພກ-ບໍລິໂພກຫຼາຍຍິ່ງຂຶ້ນ.
ໃນສິນຄ້າຕ່າງໆທີ່ຈະຂຶ້ນອັດຕາພາສີນັ້ນ ມີຜະລິດຕະພັນອຸດສາຫະກຳເຄມີ ແລະສານຊີວະພາບຢ່າງຫຼວງຫຼາຍ ແລະຜະລິດຕະພັນເຫຼົ່ານີ້ມີຜົນກຳໄລສູງແທ້ໆ ຖ້າວ່າໄດ້ຮັບການປົກປ້ອງການຄ້າໃນຂົງເຂດນີ້, ບໍລິສັດທີ່ຜະລິດຜະລິດຕະພັນດັ່ງກ່າວແຫ່ງຕ່າງໆຂອງອາເມລິກາ ກໍຈະໄດ້ຮັບຜົນປະໂຫຍດຢ່າງມະຫາສານ ແຕ່ຕະຫຼາດສິນຄ້າປະເພດດັ່ງກ່າວບໍ່ພຽງແຕ່ຢູ່ອາເມລິກາປະເທດດຽວເທົ່ານັ້ນ, ຕະຫຼາດອື່ນໆໃນໂລກກໍກວ້າງໃຫຍ່ເຊັ່ນດຽວກັນ.
ໂດຍແນໃສ່ຕໍ່ການກະທຳຂອງອາເມລິກາ, ຈີນໄດ້ຕອບໂຕ້ແລ້ວວ່າ ຈະໃຊ້ມາດຕະການທຽບເທົ່າຕໍ່ຜະລິດຕະພັນອາເມລິກາຕາມກົດໝາຍ. ວົງການພາຍນອກຄາດຄະເນວ່າ: ມາດຕະການຕ່າງໆທີ່ຈີນນຳໃຊ້ໃນການຕອບໂຕ້ອາເມລິການັ້ນ ກໍຈະເຮັດໃຫ້ອາເມລິກາຜະເຊີນກັບຄວາມ "ເຈັບປວດ" ຍາກທີ່ຈະທົນໄດ້ເຊັ່ນດຽວກັນ ແລະມາດຕະການເຫຼົ່ານີ້ ບໍ່ພຽງແຕ່ຈະເຮັດໃຫ້ເສດຖະກິດອາເມລິກາທີ່ປະສົບຄວາມຫຍຸ້ງຍາກຕ່າງໆນານາມາແລ້ວນັ້ນ ເກີດ "ບັນຫາໃຫຍ່" ອີກປະການໜຶ່ງ ແລະຍັງອາດຈະເຮັດໃຫ້ພື້ນຖານການເມືອງຂອງລັດຖະບານໂດນັນ ທຣຳຖືກກະທົບຢ່າງແຮງອີກດ້ວຍ.
