ທ່ານເກີງສວງ ໂຄສົກກະຊວງການຕ່າງປະເທດຈີນກ່າວໃນກອງປະຊຸມຖະແຫຼງຂ່າວທີ່ຈັດຂຶ້ນຢູ່ນະຄອນຫຼວງປັກກິ່ງໃນວັນທີ 4 ເມສານີ້ວ່າ: ສົງຄາມການຄ້າບໍ່ມີຝ່າຍຊະນະ, ຜູ້ກໍ່ສົງຄາມການຄ້າຈະສ້າງຜົນເສຍຫາຍໃຫ້ທັງຜູ້ອື່ນແລະຕົນເອງໃນທີ່ສຸດ, ຈີນຫວັງໃຫ້ອາເມລິກາຈະສາມາດຢຸດຕິການກະທຳຜິດພາດໃນການປະຕິບັດລັດທິຝ່າຍດຽວແລະລັດທິປົກປ້ອງການຄ້າ ແລ້ວກັບຄືນສູ່ເສັ້ນທາງທີ່ຖືກຕ້ອງຄືປຶກສາຫາລືກັນແລະຮ່ວມມືແບບຕ່າງຝ່າຍຕ່າງມີຜົນປະໂຫຍດ.
ວັນທີ 3 ເມສານີ້ ຕາມເວລາອາເມລິກາ, ຫ້ອງການຜູ້ຕາງໜ້າການຄ້າອາເມລິກາໄດ້ເປີດເຜີຍບັນຊີລາຍຊື່ຜະລິດຕະພັນຈີນທີ່ຕ້ອງເກັບພາສີສູງຕາມຜົນການກວດກາຕາມມາດຕາ 301. ຕໍ່ເລື່ອງນີ້, ທ່ານເກີງສວງກ່າວວ່າ:
"ສົງຄາມການຄ້າບໍ່ມີຝ່າຍຊະນະ, ຜູ້ກໍ່ສົງຄາມການຄ້າຈະສ້າງຜົນເສຍຫາຍໃຫ້ທັງຜູ້ອື່ນແລະຕົນເອງໃນທີ່ສຸດ,ມາດຕະການຂອງອາເມລິກາ ຈະທຳລາຍຜົນປະໂຫຍດຂອງອາເມລິກາເອງກ່ອນ. ຈີນໄດ້ສັງເກດເຫັນວ່າ ວົງການອຸດສາຫະກຳການຄ້າ, ຜູ້ບໍລິໂພກ,ສື່ມວນຊົນ,ຄັງປັນຍາພາຍໃນປະເທດອາເມລິກາຕ່າງກໍໄດ້ສະແດງຄວາມເປັນຫ່ວງຕໍ່ມາດຕະການດັ່ງກ່າວຂອງອາເມລິກາກໍຄືຜົນຮ້າຍໜັກໜ່ວງທີ່ເກີດຂຶ້ນ. ຫຼາຍປະເທດແລະອົງການຈັດຕັ້ງສາກົນກໍໄດ້ສະແດງຄວາມສົນໃຈແລະການຄັດຄ້ານຕໍ່ການກະທຳແບບລັດທິຝ່າຍດຽວແລະລັດທິປົກປ້ອງການຄ້າຂອງອາເມລິກາ. ຈີນຫວັງວ່າອາເມລິກາຈະຮັບຟັງສຽງທີ່ມີສະຕິແລະຕິດແທດຕົວຈິງ, ຢຸດຕິການກະທຳຜິດພາດໂດຍໄວເທົ່າທີ່ຈະໄວໄດ້ ແລ້ວກັບຄືນສູ່ເສັ້ນທາງທີ່ຖືກຕ້ອງຄືປຶກສາຫາລືກັນແລະຮ່ວມມືແບບຕ່າງຝ່າຍຕ່າງມີຜົນປະໂຫຍດ."
ກ່ຽວກັບການທີ່ມາດຕະການຂອງອາເມລິກາອາດຈະມີຜົນກະທົບຕໍ່ຈີນ, ທ່ານ ເກິງສວງ ກ່າວຕອບວ່າ: "ຂ້າພະເຈົ້າສາມາດບອກໃຫ້ທ່ານຮູ້ວ່າ, ແນ່ນອນມີຜົນກະທົບ, ແຕ່ພວກເຮົາສາມາດທົນທານໄດ້. ຫວນຄືນຂະບວນການປະຕິຮູບແລະໄຂປະຕູສູ່ພາຍນອກຂອງຈີນເປັນເວລາ 40 ປີ, ພວກເຮົາໄດ້ຜ່ານຜ່າສິ່ງທ້າທາຍແລະຄວາມຫຍຸ້ງຍາກ,ການລົບກວນແລະຄວາມກົດຂີ່ຕ່າງໆ, ແຕ່ກໍ່ແມ່ນຍ້ອນໃນຂະບວນການແກ້ໄຂ ແລະ ຜ່ານຜ່າຄວາມຫຍຸ້ງຍາກ,ແລະຮັບມືກັບສິ່ງທ້າທາຍດັ່ງກ່າວ, ກຳລັງຕົວຈິງຂອງພວກເຮົາຈຶ່ງໄດ້ເພີ່ມທະວີຂຶ້ນຢ່າງບໍ່ຢຸດຢັ້ງ, ຄວາມໝັ້ນໃຈໄດ້ຮັບການເພີ່ມທະວີຂຶ້ນຢ່າງບໍ່ຢຸດຢັ້ງ. ການທີ່ມີເຈດຕະນາຢາກຜ່ານການສ້າງຄວາມກົດດັນແລະຂົ່ມຂູ່ເຮັດໃຫ້ຈີນຝືນໃຈຍອມຮັບນັ້ນ, ໃນປີຜ່ານມາບໍ່ເຄີຍໄດ້ປະສົບຜົນສຳເລັດຈັກເທື່ອ,ໃນປັດຈຸບັນກໍ່ຈະບໍ່ສາມາດປະສົບຜົນສຳເລັດໄດ້ເຊັ່ນດຽວກັນ."
ທ່ານ ເກິງສວງ ຍັງຊີ້ວ່າ: ອາເມລິກາມີກຳລັງວິທະຍາສາດເຕັກນິກແລະຄວາມສາມາດການຜະລິດທີ່ນຳໜ້າຢູ່ໃນໂລກ, ຍິ່ງຄວນມີຄວາມໝັ້ນໃຈຕໍ່ຕົນເອງ ແລະແຂ່ງຂັນ ກັບບັນດາຝ່າຍຢ່າງສະຫງ່າອົງອາດ, ແຕ່ບໍ່ມີຄວາມຈຳເປັນໃຊ້ມາດຕະການລັດທິຝ່າຍດຽວ ແລະ ລັດທິປົກປ້ອງການຄ້າ, ກົດຂີ່ແລະລົບກວນຕໍ່ຄວາມພະຍາຍາມຂອງປະເທດອື່ນ.
"ຢູ່ຈີນມີຄຳສຸພາສິດເວົ້າວ່າ, ຄວາມກົດດັນສ້າງພະລັງແຮງ. ຂ້າພະເຈົ້າເຊື່ອວ່າ, ພາຍໃຕ້ສະຖານະການໃນປັດຈຸບັນ, ປັນຍາແລະຄວາມຫ້າວຫັນຂອງປະຊາຊົນຈີນຈະໄດ້ຮັບການກະຕຸກຊຸກຍູ້ຕື່ມອີກ, "ຜະລິດໂດຍຈີນ 2025" ຍ່ອມຈະໄດ້ຮັບການພັດທະນາອ່າວໄວເປັນຢ່າງດີກວ່າເກົ່າ."