ຕອນບ່າຍວັນທີ 4 ເມສານີ້ຢູ່ນະຄອນຫຼວງປັກກິ່ງ, ທ່ານວາງໂຊ້ເວີນ ຮອງລັດຖະມົນຕີກະຊວງການຄ້າຈີນຢືນຢັນວ່າ ຕໍ່ຄວາມຂັດແຍ້ງດ້ານການຄ້າລະຫວ່າງຈີນ-ອາເມລິກາໃນປັດຈຸບັນ, ຈີນມີຈຸດຢືນມາໂດຍຕະຫຼອດຄື ປະຕູແຫ່ງການເຈລະຈາແລະຫາລືແກ້ໄຂບັນຫາເປີດຕະຫຼອດ, ຫາກອາເມລິກາຍິນດີເຈລະຈາ, ຈີນກໍຍິນດີປຶກສາຫາລືກັນເພື່ອແກ້ໄຂຄວາມຂັດແຍ້ງບົນພື້ນຖານປຶກສາຫາລືຢ່າງສະເໝີພາບ,ເຄົາລົບເຊິ່ງກັນແລະກັນ.
ທ່ານວາງໂຊ້ເວີນກ່າວວ່າ: ຈີນເປີດເຜີຍບັນຊີລາຍຊື່ເພີ່ມພາສີຕໍ່ສິນຄ້ານຳເຂົ້າຈາກອາເມລິກາໃນມູນຄ່າ 50 ຕື້ໂດລາສະຫະລັດນັ້ນແມ່ນມາດຕະການທີ່ຖືກບັງຄັບໃຊ້ ແລະມີຄວາມອົດກັ້ນໄວ້. ຈີນບໍ່ຢາກເຂົ້າຮ່ວມສົງຄາມການຄ້າ, ເພາະໃນສົງຄາມການຄ້າບໍ່ມີຝ່າຍຊະນະ. ແຕ່ຈີນກໍບໍ່ຢ້ານຕໍ່ສົງຄາມການຄ້າ, ຖ້າຫາກຜູ້ໃດຢາກກໍ່ສົງຄາມການຄ້າ, ຈີນຈະຕອບໂຕ້ຈົນເຖິງທີ່ສຸດ.
ທ່ານວາງໂຊ້ເວີນກ່າວຕື່ມວ່າ: ວັນທີ 3 ເມສານີ້, ອາເມລິກາໄດ້ເປີດເຜີຍມາດຕະການເກັບພາສີສູງຕໍ່ສິນຄ້າຈາກຈີນໃນມູນຄ່າປະມານ 50 ຕື້ໂດລາສະຫະລັດພາຍໃຕ້ໂຄງການກວດກາຕາມມາດຕາ 301, ຈີນເຫັນວ່າ, ມາດຕະການນີ້ໄດ້ລະເມີດພັນທະສາກົນຂອງອາເມລິກາໃນຂັ້ນພື້ນຖານ ເຊິ່ງໄດ້ທຳລາຍຜົນປະໂຫຍດຂອງຈີນ, ເປັນໄພຂົ່ມຂູ່ຕໍ່ຄວາມໝັ້ນຄົງດ້ານເສດຖະກິດຂອງຈີນ ທັງໄດ້ກະທົບເຖິງການຟື້ນຕົວແລະຄວາມໝັ້ນທ່ຽງຂອງເສດຖະກິດໂລກນຳອີກ. ຈາກນີ້, ຕາມຈິດໃຈກົດໝາຍລະຫວ່າງຊາດ ແລະອີງຕາມມາດຕາທີ 7 ຂອງກົດໝາຍການຄ້າຕໍ່ຕ່າງປະເທດຂອງຈີນ, ບໍ່ວ່າປະເທດແລະເຂດແຄວ້ນໃດກໍຕາມ ຫາກໃຊ້ມາດຕະການ ຈຳແນກແບບເກືອດຫ້າມ,ຈຳກັດຫຼືມາດຕະການຄ້າຍຄືກັນຕໍ່ຈີນໃນດ້ານການຄ້າ, ຈີນຕ້ອງຕອບໂຕ້ດ້ວຍມາດຕະການທີ່ສົມຄູ່ກັນ.