ທາງລົດໄຟພາກໃຕ້ມາເລເຊຍ ທີ່ຈີນແລະມາເລເຊຍຮ່ວມມືກັນກໍ່ສ້າງນັ້ນ ໄດ້ຈັດພິທີລົງມືກໍ່ສ້າງຢູ່ເມືອງເຊກາມັດ ລັດໂຈຮໍ ໃນວັນທີ 3 ເມສານີ້.
ທ່ານນາຈິບ ຕຸນ ຣາຊັກ ນາຍົກລັດຖະມົນຕີມາເລເຊຍ ຊີ້ວ່າ: ໂຄງການດັ່ງກ່າວມີຄວາມໝາຍສຳຄັນເປັນຢ່າງຍິ່ງ ໂດຍຈະຊຸກຍູ້ການພັດທະນາເສດຖະກິດຢູ່ເຂດລຽບຕາມທາງລົດໄຟຢ່າງແຂງແຮງ ແລະ ສ້າງຕຳແໜ່ງວຽກເຮັດງານທຳໄດ້ຫຼາຍກວ່າເກົ່າ, ຂະນະທີ່ການຮ່ວມມືດ້ານເສດຖະກິດການຄ້າລະຫວ່າງມາເລເຊຍ-ຈີນ ກໍຈະເພີ່ມທະວີຂຶ້ນຕື່ມ.
ກ່ອນໜ້ານີ້, ກຸ່ມບໍລິສັດທາງລົດໄຟຈີນຈຳກັດ ໄດ້ປະກາດວ່າ: ໂຄງການດັ່ງກ່າວແມ່ນປັບປຸງຍົກລະດັບທາງລົດໄຟເກົ່າກວ້າງໜຶ່ງແມັດ ຈາກລັດເຈມັສ-ໂຈຮໍ ບາຮ໌ຣູ ໃຫ້ເປັນທາງລົດໄຟໄຟຟ້າ, ຍາວທັງໝົດ191,14 ກິໂລແມັດ ໂດຍນຳໃຊ້ງົບປະມານເຖິງ 8 ຕື້ 900 ລ້ານລິງກິດ ຫຼື ປະມານ 14 ຕື້ 470 ລ້ານຢວນ.
ໂຄງການດັ່ງກ່າວຮ່ວມກັນກໍ່ສ້າງໂດຍບໍລິສັດກໍ່ສ້າງທາງລົດໄຟຈີນຫຸ້ນສ່ວນຈຳກັດ ຫຼື CRCCF, ກຸ່ມບໍລິສັດທາງລົດໄຟຈີນຈຳກັດ ຫຼື CREC ແລະ ບໍລິສັດກໍ່ສ້າງການຄົມມະນາຄົມຈີນຈັດກັດ.