ຕອນຮຸ່ງເຊົ້າວັນທີ 4 ເມສານີ້, ທ່ານຈ່າງຊ້ຽງເຊິນ ເອກອັກຄະລັດຖະທູດຈີນປະຈຳອົງການການຄ້າໂລກໄດ້ອອກຖະແຫຼງການຕໍ່ບັນຊີມາດຕະການທີ່ອາເມລິກາກຽມຈະປະຕິບັດຕາມ "ມາດຕາ 301" ໂດຍຊີ້ອອກວ່າ, ອາເມລິກາເປີດເຜີຍມາດຕະການຈຳກັດທີ່ຈະປະຕິບັດ ໂດຍອີງຕາມບົດລາຍງານການສຳຫຼວດ "ມາດຕາ 301" ໄດ້ຕັ້ງໃຈລະເມີດກະຕິກາ ແລະ ລະບຽບການພື້ນຖານທີ່ສຸດ ແລະ ແກນກາງທີ່ສຸດຂອງອົງການການຄ້າໂລກ ເຊັ່ນ: ປະເທດທີ່ໄດ້ຮັບສິດທິພິເສດທີ່ສຸດ, ການຜູກມັດທາງພາສີ ແລະ ອື່ນໆ ເຊິ່ງເປັນການກະທຳລັດທິຝ່າຍດຽວ ແລະ ລັດທິປົກປ້ອງການຄ້າຢ່າງດຽວ.
ຖະແຫຼງການລະບຸວ່າ, ຈີນຈະຮ້ອງຟ້ອງຕໍ່ການກະທຳທີ່ກ່ຽວຂ້ອງຂອງອາເມລິກາ ໂດຍອີງຕາມກົນໄກແກ້ໄຂຄວາມຂັດແຍ້ງຂອງອົງການການຄ້າໂລກ. ຂະນະດຽວກັນ, ຈະອີງຕາມຂໍ້ກຳນົດທີ່ກ່ຽວຂ້ອງໃນ "ກົດໝາຍການຄ້າກັບຕ່າງປະເທດຂອງ ສປ ຈີນ", ກຽມຈະໃຊ້ມາດຕະການທີ່ສົມຄູ່ກັນທີ່ມີຄວາມແຮງເທົ່າກັນ ແລະ ຂະໜາດເທົ່າກັນ ຕໍ່ຜະລິດຕະພັນອາເມລິກາທີ່ສົ່ງເຂົ້າຈີນ ແລະ ເດັດດ່ຽວປົກປ້ອງສິດທິ ແລະ ຜົນປະໂຫຍດທີ່ຊອບດ້ວຍກົດໝາຍຂອງຕົນ.
ຖະແຫຼງການລະບຸຕື່ມວ່າ, ການກະທຳຂອງອາເມລິກາໄດ້ບັ່ນທອນພື້ນຖານຂອງອົງການການຄ້າໂລກຢ່າງໜັກໜ່ວງ ແລະ ເຮັດໃຫ້ຂອບການຄ້າຫຼາຍຝ່າຍຜະເຊີນກັບຄວາມອັນຕະລາຍແບບບໍ່ເຄີຍມີມາກ່ອນ. ຈີນຮຽກຮ້ອງໃຫ້ບັນດາສະມາຊິກອົງການການຄ້າໂລກຮ່ວມກັບຈີນ, ຕໍ່ຕ້ານການກະທຳລັດທິປົກປ້ອງການຄ້າພຽງຝ່າຍດຽວຂອງອາເມລິກາຢ່າງເດັດຂາດ.