ເຈົ້າໜ້າທີ່ກະຊວງການຄ້າຈີນເປີດເຜີຍໃນວັນທີ 4 ເມສານີ້ວ່າ, ຈີນໄດ້ສະເໜີໃຫ້ເລີ່ມຕົ້ນຂັ້ນຕອນແກ້ໄຂຄວາມຂັດແຍ້ງຂອງອົງການການຄ້າໂລກ ຫຼື WTO ຢ່າງເປັນທາງການສຳລັບກໍລະນີການກວດກາ 301 ຕໍ່ຈີນຂອງອາເມລິກາໃນວັນດັ່ງກ່າວ.
ໂຄສົກກະຊວງການຄ້າຈີນກ່າວວ່າ, ອາເມລິກາບໍ່ຫົວຊາຕໍ່ກົດລະບຽບຂອງ WTO, ຝືນກັບຄຳໝັ້ນສັນຍາຂອງຕົນທີ່ໄດ້ໃຫ້ໄວ້ກັບ WTO ແລະ ວາງຂໍ້ສະເໜີຂຶ້ນອັດຕາພາສີຕື່ມ ໂດຍອ້າງການກວດກາ 301 ຕໍ່ຈີນ ແລະ ຂຶ້ນພາສີເພີ່ມ 25% ຕໍ່ຜະລິດຕະພັນໃນເລກປະຈຳຕົວຜູ້ເສຍພາສີ 1300 ເລກຕໍ່ຈີນ ເຊິ່ງຈະພົວພັນເຖິງສິນຄ້າສົ່ງອອກຂອງຈີນປະມານ 50 ຕື້ໂດລາສະຫະລັດ. ການກະທຳແຕ່ຝ່າຍດຽວແບບນີ້ບໍ່ພຽງແຕ່ເປັນການທຳລາຍສິດ ແລະ ຜົນປະໂຫຍດທີ່ຊອບດ້ວຍກົດໝາຍຂອງຈີນຢ່າງຮ້າຍແຮງເທົ່ານັ້ນ, ຫາກຍັງລະເມີດກົດລະບຽບ WTO ຢ່າງບັງອາດ ເຊິ່ງຍ່ອມຈະບັ່ນທອນອິດທິພົນຂອບການຄ້າຫຼາຍຝ່າຍທີ່ຖືເອົາກະຕິກາເປັນພື້ນຖານ. ຈີນເດັດດ່ຽວຄັດຄ້ານຕໍ່ເລື່ອງນີ້.
ໂຄສົກຜູ້ນີ້ກ່າວຕື່ມວ່າ, ຈີນແມ່ນຜູ້ເຂົ້າຮ່ວມທີ່ຕັ້ງໜ້າ, ຜູ້ສະໜັບສະໜູນທີ່ເດັດດ່ຽວ ແລະ ຜູ້ປະກອບສ່ວນທີ່ສຳຄັນຕໍ່ການຄ້າຫຼາຍຝ່າຍ. ຈີນຫວັງ ແລະ ກໍເຊື່ອໝັ້ນວ່າ ອົງການແກ້ໄຂຄວາມຂັດແຍ້ງຂອງ WTO ຈະສາມາດແກ້ໄຂຄະດີດັ່ງກ່າວຢ່າງພາວະວິໄສ ແລະ ຍຸດຕິທຳ ເພື່ອປົກປັກຮັກສາລະບຽບການການຄ້າສາກົນທີ່ຖືເອົາກະຕິກາເປັນພື້ນຖານ.
 |
