ວັນທີ 4 ເມສານີ້, ອາເມລິກາໄດ້ເປີດເຜີຍບັນຊີລາຍການສິນຄ້າທີ່ຈະຂຶ້ນອັດຕາພາສີຕື່ມ ແລະ ກຽມຈະຂຶ້ນອັດຕາພາສີຕື່ມອີກ 25% ຕໍ່ສິນຄ້າທີ່ມີມູນຄ່າ 50 ຕື້ໂດລາສະຫະລັດໃນ 1333 ລາຍການທີ່ນຳເຂົ້າຈາກຈີນ. ເພື່ອປົກປ້ອງສິດ ແລະ ຜົນປະໂຫຍດທີ່ຊອບດ້ວຍກົດໝາຍຂອງຕົນ, ຕອນບ່າຍມື້ດຽວກັນ, ພາກສ່ວນທີ່ກ່ຽວຂ້ອງຂອງຈີນຕົກລົງໃຊ້ມາດຕະການສົມຄູ່ກັນໂດຍຂຶ້ນອັດຕາພາສີຕື່ມຕໍ່ສິນຄ້າ 106 ລາຍການໃນ 14 ປະເພດ ເຊັ່ນ: ຖົ່ວເຫຼືອງ, ລົດ, ຜະລິດຕະພັນອຸດສາຫະກຳເຄມີ ເຮືອບິນ ແລະ ອື່ນໆທີ່ນຳເຂົ້າຈາກອາເມລິກາ ເຊິ່ງອັດຕາພາສີແມ່ນ 25%. ເຈົ້າໜ້າທີ່ທີ່ກ່ຽວຂ້ອງຂອງກະຊວງການເງິນ ແລະ ກະຊວງການຄ້າຈີນເປີດເຜີຍຢູ່ນະຄອນຫຼວງປັກກິ່ງໃນມື້ດຽວກັນວ່າ, ຈີນໃຊ້ມາດຕະການເຫຼົ່ານີ້ກໍເນື່ອງຈາກຜົນບັງຄົບຈາກພາຍນອກ ແລະ ການກະທຳຂອງຕົນກໍມີຄວາມອົດກັ້ນ, ແຕ່ຈີນຈະບໍ່ອ່ອນຍອມຕໍ່ຄວາມກົດດັນໃດໆຈາກພາຍນອກ. ຖ້າມີໃຜຢາກເຮັດ "ສົງຄາມການຄ້າ", ຈີນກໍຈະຕອບໂຕ້ຈົນເຖິງທີ່ສຸດຢ່າງເດັດຂາດ.
ມື້ດຽວກັນ, ຫ້ອງການຖະແຫຼງຂ່າວຄະນະລັດຖະບານຈີນໄດ້ຈັດພິທີຖະແຫຼງຂ່າວ ເຊິ່ງມີນັກຂ່າວຈີນ ແລະຕ່າງປະເທດຮ້ອຍກວ່າຄົນເຂົ້າຮ່ວມ. ທ່ານຫວາງໂຊ້ວເວີນ ຮອງລັດຖະມົນຕີກະຊວງການຄ້າຈີນກ່າວວ່າ, ອາເມລິກາໄດ້ຂຶ້ນອັດຕາພາສີຕໍ່ສິນຄ້າເກືອບ 50 ຕື້ໂດລາທີ່ນຳເຂົ້າຈາກຈີນ ໄດ້ຝືນກັບພັນທະສາກົນຂອງອາເມລິກາ ແລະ ບໍ່ມີຫຼັກອ້າງອີງຕົວຈິງ, ຈິ່ງຈຳເປັນຕ້ອງໃຊ້ມາດຕະການຕອບໂຕ້ຫຼັງໄດ້ຮັບຜົນກະທົບຈາກອາເມລິກາ, ແຕ່ມາດຕະການຂອງຈີນແມ່ນມີຄວາມອົດກັ້ນ. ທ່ານກ່າວວ່າ, ບົນພື້ນຖານຈິດໃຈກົດໝາຍສາກົນ ແລະ ອີງຕາມເນື້ອໃນຂອງມາດຕາທີ 7 ໃນ "ກົດໝາຍການຄ້າກັບຕ່າງປະເທດ" ຂອງຈີນ, ຖ້າປະເທດ ຫຼື ເຂດແຄວ້ນໃດໃຊ້ມາດຕະການຈຳແນກໂດຍເກືອດຫ້າມ, ຈຳກັດ ຫຼື ມາດຕະການຄ້າຍຄືກັນ ຕໍ່ຈີນໃນດ້ານການຄ້າ, ພວກເຮົາຈະໃຊ້ມາດຕະການຮັບມືທີ່ສົມຄູ່ກັນ. ສະນັ້ນ, ຈີນໄດ້ເປີດເຜີຍບັນຊີລາຍການສິນຄ້າເກືອບ 50 ຕື້ໂດລາ. ຕ້ອງເວົ້າວ່າ, ຈີນແມ່ນຖືກບັງຄັບໃຊ້ມາດຕະການດັ່ງກ່າວ ແລະ ແຕ່ກໍມີຄວາມອົດກັ້ນໄວ້.
ມື້ດຽວກັນ, ທ່ານຈູ່ກ່ວງຢ້າວ ຮອງລັດຖະມົນຕີກະຊວງການເງິນຈີນກໍກ່າວວ່າ, ຈີນຖືກບັງຄັບໃຊ້ມາດຕະການຕອບໂຕ້ ແລະ ເລືອກຂຶ້ນອັດຕາພາສີຖົ່ວເຫຼືອງທີ່ນຳເຂົ້າຈາກອາເມລິກາກໍເພື່ອເຄົາລົບຄວາມຮຽກຮ້ອງຂອງຊາວກະສິກອນຈີນ. ທ່ານເຫັນວ່າ, ສອງຝ່າຍໄດ້ຍົກບັນຫາຂຶ້ນມາໄວ້ໜ້າໂຕະແລ້ວ ແລະ ປັດຈຸບັນກໍຮອດວລາການເຈລະຈາ ເພື່ອສະແຫວງຫາການຮ່ວມມືກັນ.
ໂດຍແນໃສ່ບົດລາຍງານການກວດກາ "301" ຂອງຫ້ອງການຕົວແທນການຄ້າອາເມລິກາເປັນຫ່ວງຕໍ່ "ການຜະລິດຂອງຈີນ 2025", ທ່ານຫວາງໂຊ້ເວີນ ຮອງລັດຖະມົນຕີກະຊວງການຄ້າຈີນກ່າວວ່າ, "ການຜະລິດຂອງຈີນ 2025" ສອດຄ່ອງກັບພັນທະພາຍໃຕ້ຂອບອົງການການຄ້າໂລກ, ມີລັກສະນະໂປ່ງໃສ, ເປີດປະຕູ ແລະ ບໍ່ມີຄວາຈຳແນກຕ່າງຢ່າງໃດ ແລະ ກໍຍິນດີທີ່ວິສາຫະກິດຈີນ ແລະຕ່າງປະເທດເຂົ້າຮ່ວມ.
ທ່ານກ່າວວ່າ, ຖ້າທ່ານເຫັນວ່າ "ການຜະລິດຂອງຈີນ 2025" ມີດ້ານໃດບໍ່ສອດຄ່ອງກັບພັນທະຂອງ WTO ແລະ ຝືນກັບຄຳໝັ້ນສັນຍາຂອງຈີນ, ພວກເຮົາສາມາດນຳໄປປຶກສາຫາລືກັນຢູ່ WTO ແລະ ສາມາດຮ້ອງຟ້ອງ. ພວກເຮົາບໍ່ຢາກໃຫ້ຝ່າຍໃດຕັ້ງໃຈກໍ່ຂໍ້ອ້າງຂຶ້ນ ແລະ ປະຕິບັດມາດຕະການແຕ່ຝ່າຍດຽວ. ທີ່ຈິງແລ້ວ, ມີຫຼາຍໆປະເທດໃນໂລກກໍມີດັດສະນີ ຫຼື ແຜນການລັກສະນະຊີ້ນຳທີ່ຄ້າຍຄືກັນ. ຄືວ່າ ລັດຖະບານໂອບາມາອາເມລິກາໄດ້ວາງແຜນ "ການສົ່ງອອກເພີ່ມຂຶ້ນທົບເທົ່າ" ແລະ ສະຫະພາບເອີລົບກໍມີ "ແຜນການຟື້ນຟູອຸດສາຫະກຳ". ສຳລັບ "ການຜະລິດຂອງຈີນ 2025" , ບັນດາທ່ານສາມາດໄປອ່ານຢ່າງລະອຽດ, ຢ່າຖືມັນເປັນສິ່ງໜ້າຢ້ານ.
ໃນກອງປະຊຸມຂ່າວ, ເຈົ້າໜ້າທີ່ຂອງກະຊວງການເງິນ ແລະ ກະຊວງການຄ້າຈີນລ້ວນແຕ່ກ່າວວ່າ, ຈີນກ່າວຢ່າງຈະແຈ້ງແລ້ວວ່າບໍ່ຢາກສະແຫວງຫາການໄດ້ປຽບດຸນການຄ້າ ແລະ ຫວັງໃຫ້ບັນລຸຄວາມດຸນດ່ຽງກັນດ້ານການຄ້າເທື່ອລະກ້າວໃນຂະບວນການຮ່ວມມືກັນ. ການເຮັດ "ສົງຄາມການຄ້າ" ຈະບໍ່ມີຝ່າຍໃດເປັນຝ່າຍຊະນະ. ໃນຖານະເປັນສະມາຊິກ WTO ທີ່ມີຄວາມຮັບຜິດຊອບ, ຈີນບໍ່ຢາກເຮັດ "ສົງຄາມການຄ້າ", ແຕ່ກໍບໍ່ຢ້ານການເຮັດ "ສົງຄາມການຄ້າ" ເຊັ່ນກັນ.
ທ່ານຈູ່ກ່ວງຢ້າວຍັງເປີດເຜີຍວ່າ, ເພື່ອລະນຶກວັນຄົບຮອບ 40 ປີ ແຫ່ງການປະຕິຮູບແລະເປີດປະຕູສູ່ພາຍນອກ, ຈີນຈະປະຕິບັດມາດຕະການປະຕິຮູບ ແລະ ເປີດປະຕູສູ່ພາຍນອກໃໝ່ຕື່ມອີກ ແລະ ຈີນຈະເປີດປະຕູຕໍ່ໂລກນັບມື້ນັບກວ້າງຂວາງ.