ຕາມຂ່າວCRI: ວັນທີ 6 ເມສານີ້, ທ່ານ ລູ້ຄ່າງ ໂຄສົກກະຊວງການຕ່າງປະເທດຈີນ, ທ່ານ ກ່າວເຟີ່ງ ໂຄສົກກະຊວງການຄ້າຈີນໄດ້ກ່າວໃນເວລາຕອບຄຳຖາມທີ່ກ່ຽວຂ້ອງຂອງນັກຂ່າວວ່າ: ກ່ຽວກັບບັນຫາເສດຖະກິດການຄ້າລະຫວ່າງຈີນ-ອາເມລິກາ,ຈີນບໍ່ຢາກມີສົງຄາມການຄ້າກັບອາເມລິກາ, ແຕ່ກໍ່ບໍ່ຢ້ານເຮັດສົງຄາມການຄ້າກັບອາເມລິກາ. ຈີນຈະສືບຕໍ່ເປີດກວ້າງການປະຕິຮູບແລະໄຂປະຕູສູ່ພາຍນອກ,ປົກປ້ອງຂອບການຄ້າຫຼາຍຝ່າຍ,ຊຸກຍູ້ການຄ້າແລະການລົງທຶນຂອງໂລກໃຫ້ມີຄວາມເສລີພາບແລະມີຄວາມສະດວກ.
ມີນັກຂ່າວຖາມວ່າ, ຂ່າວແຈ້ງວ່າ: ປະທານາທິບໍດີອາເມລິກາໄດ້ຮຽກຮ້ອງໃຫ້ຫ້ອງການຕົວແທນການຄ້າອາເມລິກາຄົ້ນຄວ້າກ່ຽວກັບການຈະຂຶ້ນອັດຕາພາສີຕໍ່ສິນຄ້ານຳເຂົ້າຈາກຈີນທີ່ມີມູນຄ່າເຖິງ 100 ຕື້ໂດລາສະຫະລັດຫຼືບໍ່, ກ່ຽວກັບເລື່ອງນີ້ ຈີນມີຄຳເຫັນແນວໃດ?
ທ່ານ ລູ້ຄ່າງ ກ່າວວ່າ: ຖ້າອາເມລິກາບໍ່ເອົາຫົວຊານຳການຄັດຄ້ານຈາກຈີນແລະປະຊາຄົມໂລກ, ຍຶດໝັ້ນປະຕິບັດລັດທິຝ່າຍດຽວແລະລັດທິປົກປ້ອງການຄ້າ, ຈີນຈະຕອບໂຕ້ດ້ວຍການກະທຳຕົວຈິງຢ່າງເຖິງຖອງ ໂດຍບໍ່ຢ້ານເສຍຄ່າຕອບແທນຢ່າງໃດ, ຈະຕອບໂຕ້ຢ່າງເດັດຂາດ, ຍ່ອມຈະໃຊ້ມາດຕະການຮັບມືໂດຍລວມໃໝ່,ເດັດດ່ຽວປົກປ້ອງຜົນປະໂຫຍດຂອງປະຊາຊົນກໍ່ຄືຂອງປະເທດ.
ທ່ານ ກ່າວເຟີ່ງ ຊີ້ອອກວ່າ: ການປະທະກັນທາງເສດຖະກິດການຄ້າລະຫວ່າງຈີນ-ອາເມລິກາຄັ້ງນີ້ແມ່ນອາເມລິກາກໍ່ຂຶ້ນແຕ່ຝ່າຍດຽວ,ທາດແທ້ແມ່ນລັດທິຝ່າຍດຽວຂອງອາເມລິກາທ້າທາຍຕໍ່ລັດທິຫຼາຍຝ່າຍຂອງໂລກ ແລະ ລັດທິປົກປ້ອງຂອງອາເມລິກາທ້າທາຍຕໍ່ການຄ້າເສລີທົ່ວໂລກ. ຈີນຈະສືບຕໍ່ເປີດກວ້າງການປະຕິຮູບແລະໄຂປະຕູສູ່ພາຍນອກ,ປົກປ້ອງຂອບການຄ້າຫຼາຍຝ່າຍ,ຊຸກຍູ້ການຄ້າແລະການລົງທຶນຂອງໂລກໃຫ້ມີຄວາມເສລີແລະມີຄວາມສະດວກ.
 |
