ເນື່ອງຈາກວ່າອາເມລິກາໄດ້ເປີດເຜີຍບັນຊີລາຍການສະເໜີຂຶ້ນອັດຕາພາສີ ໂດຍອີງຕາມ "ການກວດກາ 301", ວັນທີ 4 ເມສານີ້, ຈີນໄດ້ເປີດເຜີຍມາດຕະການສົມຄູ່ກັນຂຶ້ນອັດຕາພາສີຕໍ່ສິນຄ້າອາເມລິກາທີ່ມີມູນຄ່າ 50 ຕື້ໂດລາ ເຊິ່ງລວມທັງຖົ່ວເຫຼືອງ, ເຮືອບິນ ແລະ ອື່ນໆ ທີ່ນຳເຂົ້າຈາກອາເມລິກາ. ການກະທຳທີ່ບໍ່ຢ້ານ, ບໍ່ຫຼີກ ແລະ ປົກປ້ອງສິດ ແລະ ຜົນປະໂຫຍດຊອບກົດໝາຍຂອງຈີນໄດ້ພາໃຫ້ວົງການຕ່າງປະເທດຂອງອາເມລິກາສົນໃຈນຳໃນລະດັບສູງ. ຫຼາຍບໍລິສັດສຳຄັນ ແລະ ວົງການການຄ້າອາເມລິກາລ້ວນແຕ່ສະແດງທ່າທີ ໂດຍຮຽກຮ້ອງໃຫ້ລັດຖະບານສອງປະເທດປຶກສາຫາລືກັນ ເພື່ອແກ້ໄຂບັນຫາການຄ້າ.
ວັນທີ 4 ເມສານີ້, ທ່ານຈອນ ໄຮສດໍເຟີ ປະທານສະມາຄົມຖົ່ວເຫຼືອງອາເມລິກາອອກຖະແຫຼງການ ໂດຍຮຽກຮ້ອງໃຫ້ລັດຖະບານທຣຳແກ້ໄຂຄວາມຂັດແຍ້ງທາງການຄ້າ ແລະ ສິດຊັບສິນທາງປັນຍາກັບຈີນດ້ວຍທ່າທີ "ລັກສະນະສ້າງສັນ", ຫາກບໍ່ແມ່ນອີງໃສ່ມາດຕະການ "ລົງໂທດ" ເພື່ອຫຼີກເວັ້ນບໍ່ໃຫ້ຜົນປະໂຫຍດຂອງຊາວກະສິກອນປູກຖົ່ວເຫຼືອງຂອງອາເມລິກາຖືກກະທົບກະເທືອນຢ່າງໜັກໜ່ວງ.
ເຈົ້າໜ້າທີ່ບໍລິສັດ GS ອາເມລິກາກ່າວໃນວັນທີ 4 ເມສານີ້ວ່າ, ຖ້າຈີນຂຶ້ນອັດຕາພາສີຕໍ່ຖົ່ວເຫຼືອງທີ່ນຳເຂົ້າຈາກອາເມລິກາ, ອາດຈະພາໃຫ້ປະລິມານການສົ່ງອອກຖົ່ວເຫຼືອງຂອງອາເມລິກາຫຼຸດລົງ ແລະ ທຳລາຍຜົນປະໂຫຍດຂອງຊາວກະສິກອນປູກຖົ່ວເຫຼືອງອາເມລິກາ.
ບໍລິສັດລົດຍົນ GM ອາເມລິກາອອກຖະແຫຼງການໃນວັນທີ 4 ເມສານີ້ ໂດຍຂຽນວ່າ, ພວກເຮົາສະໜັບສະໜູນການພົວພັນການຄ້າທີ່ຕັ້ງໜ້າລະຫວ່າງອາເມລິກາແລະຈີນ, ຂະນະດຽວກັນ, ພວກເຮົາຮຽກຮ້ອງໃຫ້ລັດຖະບານສອງປະເທດສືບຕໍ່ດຳເນີນການປຶກສາຫາລືກັນທີ່ມີລັກສະນະສ້າງສັນ ແລະ ປະຕິບັດນະໂຍບາຍການຄ້າທີ່ສືບເນື່ອງ.
ບໍລິສັດລົດຍົນຟອດຂອງອາເມລິກາອອກຖະແຫຼງການໃນວັນທີ 4 ເມສານີ້ໂດຍຂຽນວ່າ, ບໍລິສັດຕົນສົ່ງເສີມໃຫ້ລັດຖະບານສອງປະເທດພະຍາຍາມຮ່ວມກັນ ເພື່ອແກ້ໄຂບັນຫາການຄ້າລະຫວ່າງ 2 ກຸ່ມເສດຖະກິດທີ່ໃຫຍ່ທີ່ສຸດໃນໂລກ.
ບໍລິສັດໂບອິງ ທີ່ຖືເອົາຕະຫຼາດຈີນເປັນຕະຫຼາດສຳຄັນໃນຂອບເຂດທົ່ວໂລກອອກຖະແຫຼງການໃນວັນທີ 4 ເມສານີ້ໂດຍຂຽນວ່າ, ບໍລິສັດຕົນຫວັງໃຫ້ຜູ້ນຳອາເມລິກາແລະຈີນສາມາດດຳເນີນການສົນທະນາລັກສະນະສ້າງສັນໃນໄວໆນີ້ ແລະ ຈະສືບຕໍ່ພະຍາຍາມ ເພື່ອຕິດຕໍ່ພົວພັນກັບລັດຖະບານສອງປະເທດຢ່າງເປັນເຈົ້າການ.