ໂດຍແນໃສ່ປະທານາທິບໍດີອາເມລິກາຮຽກຮ້ອງໃຫ້ຫ້ອງການຕົວແທນການຄ້າອາເມລິກາຄົ້ນຄວ້າວ່າຈະຂຶ້ນອັດຕາພາສີຕື່ມຕໍ່ສິນຄ້າທີ່ມີມູນຄ່າ 100 ຕື້ໂດລາສະຫະລັດທີ່ນຳເຂົ້າຈາກຈີນນັ້ນຫຼືບໍ່, ວັນທີ 6 ເມສານີ້, ສະພາການຄ້າສາກົນຈີນໄດ້ອອກຖະແຫຼງການໂດຍຂຽນວ່າ, ວົງການອຸດສາຫະກຳການຄ້າຈີນເດັດດ່ຽວຄັດຄ້ານກິລິຍາວ່າຈາທີ່ຂາດສະຕິສຳປະຊັນຍະແບບນີ້ ແລະ ທວງໃຫ້ລັດຖະບານອາເມລິກາຢ່າເດີນຕາມເສັ້ນທາງທີ່ຜິດພາດຕໍ່ໄປ.
ຖະແຫຼງການຂຽນວ່າ, ສະພາການຄ້າສາກົນຈີນໄດ້ຄົ້ນຄວ້າ ແລະ ວິໄຈຕໍ່ການກວດກາ 301 ແລະ ບົດລາຍງານທີ່ກ່ຽວຂ້ອງຂອງຈີນຢ່າງລະອຽດ ໂດຍໄດ້ເຫັນເຖິງການກວດກາ ແລະ ບົດລາຍງານມີຫຼາຍບັນຫາທາງກົດໝາຍ ເຊັ່ນ: ໄດ້ຕັ້ງຜົນການກວດກາຢູ່ກ່ອນການກວດກາ, ຂາດຫຼັກຖານຕົວຈິງ, ໃຊ້ສອງມາດຖານ ເຫຼົ່ານີ້ເປັນຕົ້ນ. ລັດຖະບານຈີນໄດ້ກ່າວຟ້ອງການກວດກາ 232 ແລະ ການກວດກາ 301 ຂອງອາເມລິກາຕໍ່ອົງການການຄ້າໂລກແລ້ວ, ພວກເຮົາໄດ້ສະໜັບສະໜູນເລື່ອງນີ້ຢ່າງເດັດຂາດ. ຜົນການກວດກາສະແດງໃຫ້ເຫັນວ່າ, ນັບແຕ່ອາເມລິກາປະກາດກຽມຂຶ້ນອັດຕາພາສີຕື່ມຕໍ່ສິນຄ້າທີ່ມີມູນຄ່າ 50 ຕື້ໂດລາສະຫະລັດຕໍ່ຈີນມານີ້, ວິສາຫະກິດຈີນ ແລະ ອາເມລິກາໄດ້ປະສົບຄວາມຫຍຸ້ງຍາກຫຼາຍຂຶ້ນໃນການປະຕິບັດສັນຍາ ແລະ ມີຄວາມສ່ຽງທີ່ຈະປະຕິບັດຕາມສັນຍາບໍ່ໄດ້ ໃນການຄ້າລະຫວ່າງສອງຝ່າຍ, ອາເມລິກາໄດ້ລົບກວນລະບຽບການການຄ້າສາກົນປົກກະຕິຢ່າງຮ້າຍແຮງ ແລະ ນຳເອົາຄວາມເສຍຫາຍທີ່ຄາດຄິດບໍ່ໄດ້ຕໍ່ວົງການອຸດສາຫະກຳການຄ້າສອງປະເທດ.
ຖະແຫຼງການຂຽນຕື່ມວ່າ, ລັດທິປົກປ້ອງການຄ້າເຄີຍພາໃຫ້ເກີດໄພພິບັດໜັກໜ່ວງໃນປະຫວັດສາດ, ຂອບການຄ້າຫຼາຍຝ່າຍທີ່ໝັ້ນຄົງໄດ້ມາບໍ່ງ່າຍ, ສະນັ້ນ, ທຸກສະມາຊິກອົງການການຄ້າໂລກລ້ວນແຕ່ຄວນຖະໜຸຖະໜອມ ແລະ ປົກປັກຮັກສາຂອບການຄ້າຫຼາຍຝ່າຍ. ພວກເຮົາຮຽກຮ້ອງໃຫ້ວົງການອຸດສາຫະກຳສາກົນ ເຊິ່ງລວມທັງວົງການອຸດສາຫະກຳອາເມລິກາ ໃຊ້ມາດຕະການບັງເກີດຜົນຢ່າງທັນການ, ທວງໃຫ້ລັດຖະບານອາເມລິກາຮູ້ກັບຕ່າວຄືນ, ຮ່ວມກັນປົກປ້ອງຂອບການຄ້າຫຼາຍຝ່າຍ, ຊຸກຍູ້ໃຫ້ການຄ້າທົ່ວໂລກມີເສລີພາບ ແລະ ມີຄວາມສະດວກ ແລະ ປົກປັກຮັກສາສະພາບແວດລ້ອມທຸລະກິດການຄ້າສາກົນທີ່ຍຸດຕິທຳ ແລະ ເປັນທຳ.
 |
