ກອງປະຊຸມສຸດຍອດສື່ມວນຊົນອາຊີທີ່ເນັ້ນຫົວຂໍ້ "ຍຸກໃໝ່ແຫ່ງການຮ່ວມມືຂອງສື່ມວນຊົນອາຊີ: ການເຊື່ອມຈອດກັນແລະການພັດທະນາແບບຫົວຄິດປະດິດສ້າງ" ໄດ້ໄຂຂຶ້ນຢູ່ເມືອງຊ່ານຢ້າແຂວງໄຫຫຼຳ ສປ ຈີນໃນວັນທີ 9 ເມສານີ້ ເຊິ່ງເປັນໄລຍະຈັດກອງປະຊຸມເວທີປຶກສາຫາລືອາຊີໂປອາວປະຈຳປີ 2018. ທ່ານ ຮວງຄຸ່ນມິງ ກຳມະການກົມການເມືອງສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກກອມມູນິດຈີນ ໄດ້ເຂົ້າຮ່ວມພິທີໄຂກອງປະຊຸມ ແລະໄດ້ກ່າວປາຖະກະຖາເລື່ອງ "ສົ່ງເສີມຈິດໃຈເປີດປະຕູສູ່ພາຍນອກແລະປະດິດສ້າງໃໝ່, ຮ່ວມກັນຊຸກຍູ້ຄວາມຈະເລີນຮຸ່ງເຮືອງແລະການພັດທະນາຂອງອາຊີ".
ທ່ານ ຮວງຄຸ່ນມິງ ຊີ້ໃຫ້ເຫັນວ່າ, ປີນີ້ເປັນປີຄົບຮອບ 40 ປີແຫ່ງການປະຕິຮູບແລະໄຂປະຕູສູ່ພາຍນອກຂອງຈີນ, ໃນຮອບ 40 ປີມານີ້, ການປະຕິຮູບແລະການພັດທະນາຂອງຈີນ ໄດ້ຮັບຜົນປະໂຫຍດຈາກອາຊີ, ຍິ່ງປະກອບສ່ວນເພື່ອອາຊີ, ໄດ້ເຊື່ອມໂຍງເຂົ້າກັບໂລກ, ຍິ່ງສ້າງຜົນປະໂຫຍດໃຫ້ແກ່ໂລກ, ຈີນຍິນດີຮ່ວມກັບອາຊີແລະໂລກສືບຕໍ່ສະແຫວງຫາວິທີປະດິດສ້າງໃໝ່ ແລະຊົມໃຊ້ໝາກຜົນການພັດທະນາຮ່ວມກັນ. ພາຍໃຕ້ເບື້ອງຫຼັງທີ່ໂລກໄດ້ມີການພັດທະນາໃຫຍ່, ການປ່ຽນແປງໃຫຍ່ແລະການປັບປຸງໃຫຍ່ໃນປັດຈຸບັນ, ທ່ານ ສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນໄດ້ສະເໜີແນວຄິດແລະຄວາມເຫັນທີ່ສຳຄັນຕ່າງໆທີ່ພົວພັນເຖິງອະນາຄົດແລະຊາຕາກຳຂອງມວນມະນຸດເຊັ່ນການສ້າງປະຊາຄົມຮ່ວມຊາຕາກຳຂອງອາຊີກໍຄືຂອງມວນມະນຸດຢ່າງມີຫົວຄິດປະດິດສ້າງດ້ວຍສາຍຕາໂລກແລະຈິນຕະນາການຍຸດທະສາດທີ່ເປັນນັກການເມືອງແລະນັກຍຸດທະສາດທີ່ດີເດັ່ນ, ເຊິ່ງເປັນການສະໜອງສະຕິປັນຍາຈີນແລະແຜນການຈີນເພື່ອຊຸກຍູ້ສັນຕິພາບ, ການພັດທະນາຂອງໂລກ ແລະຄວາມຈະເລີນຮຸ່ງເຮືອງ-ຄວາມກ້າວໜ້າຂອງອາຊີ.
ທ່ານ ຮວງຄຸ່ນມິງ ເນັ້ນວ່າ, ສື່ມວນຊົນອາຊີຄວນສົ່ງເສີມຫົວຂໍ້ຍຸກສະໄໝ, ສົ່ງເສີມຈິດໃຈປະດິດສ້າງໃໝ່, ເຕົ້າໂຮມຄວາມເຫັນທີ່ເປັນເອກະພາບໃນການຮ່ວມມື, ຊຸກຍູ້ການແລກປ່ຽນລະຫວ່າງອາລະຍະທຳ, ເຜີຍແຜ່ສຽງອາຊີ, ຕັ້ງໜ້າໃຫ້ກຳລັງໃຈແລະຮຽກຮ້ອງເພື່ອຄວາມຈະເລີນຮຸ່ງເຮືອງຂອງອາຊີ, ເລົ່າເລື່ອງທີ່ປະຊາຊົນອາຊີປະດິດສ້າງໃໝ່ແລະບັນດາປະເທດຮ່ວມມືກັນຕ່າງຝ່າຍຕ່າງໄດ້ຮັບຜົນປະໂຫຍດຮ່ວມກັນສ, ເສີມຂະຫຍາຍບົດບາດນຳພາຂອງຫາງສຽງໃນທາງບວກຢ່າງເຕັມສ່ວນ, ຊຸກຍູ້ການສ້າງໂລກທີ່ສວຍງາມແລະອາຊີທີ່ສວຍງາມ.
ຜູ້ຮັບຜິດຊອບຂອງສື່ມວນຊົນຕົ້ນຕໍ 140 ກວ່າທ່ານຈາກ 40 ປະເທດອາຊີພ້ອມດ້ວຍນັກວິຊາການດ້ານວັດທະນະທຳແລະຜູ້ຕາງໜ້າຝ່າຍທີ່ກ່ຽວຂ້ອງຂອງອາຊີລວມ 300 ກວ່າທ່ານໄດ້ເຂົ້າຮ່ວມພິທີໄຂກອງປະຊຸມ.
 |
