ທ່ານຫຼີເຄີ້ສຽງກ່າວວ່າ: ສ້າງບັນຍາກາດທີ່ດີ ເພື່ອປັບປຸງສາຍພົວພັນຈີນ-ຍີ່ປຸ່ນ

ວັນທີ 9 ເມສານີ້, ທ່ານຫຼີເຄີ້ສຽງ ນາຍົກລັດຖະມົນຕີຈີນໄດ້ພົບປະກັບທ່ານໂກໂນະ ໂຢເຮອິ ປະທານສະມາຄົມສົ່ງເສີມການຄ້າສາກົນຍີ່ປຸ່ນ ພ້ອມດ້ວຍຄະນະຢູ່ນະຄອນຫຼວງປັກກິ່ງ.

ທ່ານຫຼີເຄີ້ສຽງກ່າວວ່າ: ປັດຈຸບັນນີ້, ສາຍພົວພັນຈີນ-ຍີ່ປຸ່ນໄດ້ຮັກສາທ່າອ່ຽງຟື້ນຟູດີຂຶ້ນ, ແຕ່ຍັງມີສິ່ງທ້າທາຍ. ສະນັ້ນ, ຄວນຮັກສາຄວາມເບິ່ງກວ້າງເຫັນໄກ ແລະຄວາມເຊື່ອໝັ້ນຢ່າງເດັດດ່ຽວ, ເພື່ອສ້າງບັນຍາກາດທີ່ດີໃຫ້ສາຍພົວພັນສອງປະເທດກັບຄືນເສັ້ນທາງທີ່ປອດໃສ.

ທ່ານຫຼີເຄີ້ສຽງຊີ້ໃຫ້ເຫັນວ່າ: ປີນີ້ແມ່ນປີຄົບຮອບ 40 ປີທີ່ໄດ້ເຊັນສັນຍາໄມຕີຈິດມິດຕະພາບຈີນ-ຍີ່ປຸ່ນ, ຫວັງວ່າຍີ່ປຸ່ນສາມາດຮ່ວມກັບປະເທດຈີນປະຕິບັດຕາມເອກະສານການເມືອງ 4 ສະບັບ, ຖອດຖອນບົດຮຽນປະຫວັດສາດ, ຫັນໜ້າສູ່ອະນາຄົດ, ຊຸກຍູ້ສາຍພົວພັນຈີນ-ຍີ່ປຸ່ນໃຫ້ໄດ້ຮັບການປັບປຸງຢ່າງຕໍ່ເນື່ອງ ແລະພັດທະນາຕາມທິດທາງທີ່ຖືກຕ້ອງ.

ທ່ານໂກໂນະ ໂຢເຮອິກ່າວວ່າ: ວົງການອຸດສາຫະກຳ-ການຄ້າຍີ່ປຸ່ນສະແດງຄວາມຍິນດີທີ່ສາຍພົວພັນຍີ່ປຸ່ນ-ຈີນດີຂຶ້ນຢ່າງຕໍ່ເນື່ອງ ແລະຫວັງວ່າຈະໄດ້ປະກອບສ່ວນເຂົ້າໃນໄມຕີຈິດມິດຕະພາບຂອງສອງປະເທດ.